Ditën e martë, më 12 shkurt 2013, ka mbërritur për një vizitë disa ditore në Shkodër, Imam Didmar Faja, drejtues i Qendrës Islame Shqiptare-Amerikane të Phoenix në shtetin Arizona të ShBA.
           
Fillimisht, ai ka zhvilluar një takim të përzemërt e vëllazëror në Myftininë Shkodër, ku është pritur nga Myftiu i Shkodrës Imam Muhamed Sytari dhe stafi i tij.
           
Gjatë bashkëbisedimit, Myftiu, pasi i ka uruar mirëseardhjen Imam Didmar Fajës, është interesuar për shëndetin dhe aktivitetin e tij fetar e shkencor në Arizona dhe përtej saj në shtetet e ndryshme të Amerikës, ku imami i nderuar ka një aktivitet të lavdëruar në rrugën e lartësimit të Thirrjes Islame. Ai e ka informuar Myftiun se sapo është kthyer nga një aktivitet me vlera të mëdha fetare në North Carolina të ShBA, ku është dëshmuar dashuria për të Dërguarin e All-llahut, Hz. Muhammedin (a.s) dhe mësimet e tij.
           
Nga ana e tij, Myftiu e ka informuar imamin e “Greenway Masjid” për aktivitetet e Myftinisë Shkodër dhe botimet e reja të saj dhe të Komunitetit Mysliman të Shqipërisë, si: revista “Drita Islame”, revista shkencore “Zani I Naltë”, gazeta “Udha Islame”, “Buletin” etj.
           
Gjatë këtij takimi është biseduar edhe për bashkëpunime të ndryshme në fushën e botimeve, atë të përkthimeve nga gjuhët e ndryshme etj, ku është rënë dakord për shërbime të përbashkëta në këtë drejtim.           

Myftiu e ka ftuar Imam Didmar Fajën për të mbajtur hytben e xhumasë së ardhshme, më 15 shkurt 2013, në xhaminë e Parrucës, si dhe të marrë pjesë si referues në disa aktivitete fetare që Myftinia Shkodër do të organizojë për nder të vizitës së tij në Shkodër.