Paraditën e së mërkures, më 9 janar 2013, Myftiu i Shkodrës Imam Muhamed Sytari, i shoqëruar edhe nga një grup imamësh e këshilltarësh, ka zhvilluar një vizitë në shtëpinë e Hoxhës së moshuar, H. Musa Hoxha.
 
Fillimisht, Myftiu është interesuar për shëndetin e Hoxhës, që ka lindur në vitin 1926 dhe që ka ndjekur studimet fetare për një periudhë disa vjeçare para duarve të hoxhallarëve të nderuar të Shkodrës si: H. Muhamed Bekteshi, H. Esat Myftija, H. Ibrahim Kaduku etj, te të cilët ka filluar hatmen e Kur'anit, vasin, gramatikën arabe, etj.
 
Hafizi i moshuar ka shprehur kënaqësinë e tij për këtë vizitë duke theksuar mirënjohjen për Myftininë Shkodër dhe vlerësimin që i bën ajo hoxhallarëve të shkuar të Shkodrës dhe nxënësve e familjarëve të tyre.
 
Bashkëbisedimi ka vijuar me kujtime të shumta nga jeta e shkuar e H. Musa Hoxhës, që ka sjellë në vëmendje të vizitorëve të tij momente emocionale nga e kaluara para duarve të hoxhallarëve të Shkodrës, momente të vështira nga sprova e besimit nën regjimin komunist, zhvillimi i i disa ritualeve fetare në fshehtësi të madhe etj.
 
Me kërkesë të Myftiut, H. Musa Hoxha ka bërë edhe një duá për të pranishmit, ku i është lutur Zotit për mbarësinë dhe zhvillimin e Thirrjes Islame, lartësimin e saj dhe gjallërimin e jetës fetare në Shkodër e në mbarë Shqipërinë.
 Në shenjë kujtimi të kësaj vizite, Myftiu i ka dhuruar H. Musa Hoxhës një panoramë me fotot e hoxhallarëve më të shquar të Shkodrës gjatë 100 viteve të fundit.