Ditën e enjte, më 3 janar 2013, Myftiu i Shkodrës Imam Muhamed Sytari, i shoqëruar edhe nga menaxheri i pronave të Myftinisë Shkodër, z. Blendi Alushi dhe antari i Këshillit të Myftinisë Shkodër, z. Artur Tagani, ka zhvilluar një inspektim në terren, për të parë nga afër punimet që po bëhen në prag të ceremonisë për hedhjen e gur-themelit të xhamisë së re në fshatin Barbullush.
           
Myftiu ka parë nga afër punimet e para, nga hapja e themeleve, betonizimi dhe përgatitja e terrenit për ceremoninë e gur-themelit të kësaj xhamie të re, që pritet të zhvillohet në një kohë shumë të afërt. Me këtë rast, Myftiu ka përgëzuar punimet që po bëhen dhe ka shprehur kënaqësinë e tij që pas shumë përpjekjeve, xhamia e re e fshatit Barbullush ka hyrë në shinat e duhura.
           
Xhamia e re e fshatit Barbullush, me sponsorizimin e Myftinisë së Iskenderunit, do të ndërtohet në kuadër të binjakëzimit që Myftinia Shkodër ka bërë me atë të Iskenderunit (Turqi). Më parë, 8 nëntor 2012, Myftiu i Shkodrës Imam Muhamed Sytari, ka pritur në një takim të përzemërt e vëllazëror, Myftiun e Iskenderunit (Turqi), H. Hamdi Kavillioğlu, i cili ka zhvilluar një vizitë zyrtare në Myftininë Shkodër, për të zyrtarizuar fillimin e punimeve për këtë xhami të re.           

Myftiu ka inspektuar nga afër edhe gjendjen e vakëfit të Myftinisë Shkodër në Krye-Bushat, ku ka parë nga afër varrezat muslimane dhe rrënojat e xhamisë së vjetër të këtij fshati, mbyllur dhe tjetërsuar në vitin 1967.