Paraditën e së enjtes, më 20 dhjetor 2012, Myftiu i Shkodrës Imam Muhamed Sytari, në shoqëri të menaxherit të pronave të Myftinisë, z. Blendi Alushi, ka zhvilluar një inspektim në terren, për të parë nga afër vijimin e punimeve për shtimin e xhamisë së lagjes Perash me një ambient shtesë dhe përgatitjet për përfundimin e punimeve në xhaminë e re të fshatit Mes-Myselim.
 
Fillimisht në xhaminë e lagjes Perash, Myftiu i shoqëruar edhe nga imami i xhamisë, teologu Adem Pizga, ka ndjekur punimet që po bëhen dhe ka vlerësuar se hapësirat e reja do t’i shtojnë bukuri dhe hijeshi xhamisë që frekuentohet nga banorët e lagjes dhe jo vetëm.
 
Myftiu ka falënderuar ekipin e ndërtuesve, duke shprehur vlerësimin e tij për atë që është bërë deri tani.
 
Më pas, Myftiu ka ndjekur nga afër edhe fazën përfundimtare të shtrimit të parketit në xhaminë e re të fshatit Mes-Myselim, që po ndërtohet nga e para. Ndonëse ndërtimi ka marrë një kohë të konsiderueshme, Myftiu ka vlerësuar se kjo xhami është një ndër ndërtimet më të mira jo vetëm në zonën e Postribës, por në krejt rrethin e Shkodrës.
 
Ditët në vijim, Myftinia Shkodër ka planifikuar të zhvillojë inspektime në zonat ku po ndërtohen xhami të reja, si: në lagjen Dërgut (në prag përfundimi), te Ura e Bunës, në fshatin Kuç (në prag përfundimi), në fshatin Bërdicë e Sipërme (në prag inaugurimi), në fshatin Trush, si dhe në fshatin Barbullush, ku pritet të zhvillohet ceremonia e përcaktimit të drejtimit të kibles e më pas ajo e hedhjes së themeleve për ndërtimin e xhamisë së re.