Nëpërmjet hytbes së xhumasë në xhaminë e Parrucës, Myftiu i Shkodrës ka vazhduar të flasë mbi rolin e shquar të hoxhallarëve shkodranë në shërbim të besimit dhe shoqërisë shqiptare.
 
Duke iu referuar fakteve historike dhe studimeve të jetës dhe veprës së hoxhallarëve të shquar të Shkodrës, Myftiu ka hedhur dritë mbi madhështinë e hoxhallarëve të Shkodrës, të cilët “qëndrojnë në themelet e virtyteve më të mira dhe traditave shekullore të Shkodrës”.
 
Në këtë hytbe, Myftiu ka folur edhe për shembullin e disa hoxhallarëve në përpjekjet për mbrojtjen e Shkodrës nga përpjekjet pushtuese serbo-malazeze. Myftiu ka thënë se: “Hoxhallarë të shumtë ranë a u plagosën në betejat e tyre në luftë për mbrojtjen e Shkodrës dhe trojeve shqiptare nga serbo-malazezët, si rasti i dy hoxhallarëve të nderuar, H. Halil Gavoçi dhe H. Sulejman Gavoçi, babë e bir, të cilët “në vitin 1913, kur Shkodra u rrethua nga forcat serbe e malazeze… rrokën armët e dolën vullnetarë për mbrojtjen e qytetit nën komandën e Hasan Riza Pashës”. Po ashtu Sheh Ali Kruja (1884-1976), që doli dy herë në frontet për mbrojtjen e Shkodrës nga serbo-malazezët. Në betejën e tij të dytë, në vitin 1920, në frontin e Koplikut, “nga plaga e rëndë humbi syrin e majtë”.
 
Myftiu ka përmendur edhe shembullin e lartë të dijetarit dhe poliglotit të shquar shkodran, Hafiz Abaz Golemi. Ka thënë: “Hafiz Abaz Golemi (1870-1925), “që në vitin 1895 emërohet mësues i persishtes dhe i besimit në shkollën qytetëse”. Studiuesit e jetës së tij dëshmojnë se ai: “Përveç persishtes zotëronte edhe arabishten, turqishten, frëngjishten, italishten e serbokroatishten”. Nuk duhet të harrojmë se: “Në vitin 1913 Komisioni Arsimor i Bashkisë, i kryesuar nga Xhemal Naipi, kadi i Shkodrës në atë kohë, hapi tri shkolla shtetërore: Shkolla Popullore me drejtor Gaspër Mikeli, e Rusit me drejtor Molla Medo Sukniqi dhe e Parrucës me drejtor Haxhi Hafiz Abaz Golemi”.
 
Myftiu ka thënë: “Nuk do të ishte utopike që shkolla e gjuhëve të huaja në Shkodër të kishte emrin e këtij dijetari të madh e të shquar, një ndër baballarët e arsimit model në Shkodër”.
 
Gjatë kësaj hytbeje Myftiu ka bërë thirrje për unitet dhe për evitimin e çdo tendence përçarëse në mesin e muslimanëve.
 
Ndërkohë, në hytben e dytë, Myftiu ka kërkuar nga besimtarët që të luten për vëllezërit muslimanë në Siri. Ai ka shpjeguar se tokat e bekuara të Sirisë dhe populli vëlla sirian, po kalojnë sot ditë të vështira, plot stres, mungesë në ushqime, siguri e paqe. Myftiu ka kërkuar që muslimanët mos t’i kursejnë lutjet e tyre për vëllezërit tanë në Siri, si një obligim i shenjtë islam.