Pasditën e së xhumasë, më 7 dhjetor 2012, Myftinia Shkodër ka organizuar një aktivitet shkencor në përkujtim të 10 vjetorit të daljes në qarkullim të gazetës së përmuajshme “Udha Islame”, organ mediatik i Myftinisë së Zonës Shkodër.
           
Në këtë aktivitet me vlerë, kanë marrë pjesë edhe anëtarët e Kryesisë së Komunitetit Mysliman të Shqipërisë, z. Agron Hoxha (Drejtor i Marrëdhënieve me Jashtë dhe Media), z. Genti Kruja (Drejtor i Kulturës dhe Dialogut Ndërfetar) dhe z. Uran Kalej (Drejtor i Vakf-Investime). Nderonin me pjesëmarrjen e tyre edhe Famullitari i Kishës Ortodokse në Shkodër, At Nikolla Petani, Drejtori i Bibliotekës, z. Gjovalin Çuni, Kryetari i Këshillit të Qarkut Shkodër, z. Maxhid Cungu, Myftiu i Malësisë së Madhe, H. Edmir Smajlaj etj.
           
Aktiviteti ka nisur me fjalën hapëse të mbajtur nga teologu Altin Loshi, ku ka bërë një prezantim të shkurtër të mesazhit dhe frymës që ka karakterizuar gazetën në këto 10 vite të para të jetës së saj.
           
Në fjalën përshëndetëse, Myftiu i Shkodrës Imam Muhamed Sytari ka sjellur në mendje të pranishëmve kontributet e mëdha të hoxhallarëve të Shkodrës në shkrimin shqip dhe nxitjen e tyre për të shkruar e dokumentuar shpirtin e Thirrjes Islame në gjuhën shqipe. Ai ka uruar mbarësi dhe suksese të mëtejshme për gazetën dhe misionin e saj.
           
Në emër të Komunitetit Mysliman të Shqipërisë, ka përshëndetur z. Agron Hoxha. Fillimisht ka përcjellë urimet dhe përshëndetjet e përzemërta të Kryetarit të Komunitetit Mysliman të Shqipërisë, H. Selim Muça. Njëkohësisht ka vënë theksin te rëndësia që kanë organet mediatike për një shoqëri që përpiqet të rregullohet ditë pas dite në dritën e besimit dhe dijes. Ai ka falënderuar kontributin dhe rolin e nismëtarëve për krijimin e gazetës “Udha Islame” dhe e ka vlerësuar misionin e saj në këto 10 vite.
           
Më pas ka referuar teologu Arben Halluni, kryeredaktor i parë i gazetës “Udha Islame” dhe shkrimtari Xhahid Bushati, një ndër bashkëpunëtorët më të afirmuar të saj.
           
Në fjalën e tij me temë: “Mesazhe dhe udhëzime në 10 vjet “Udha Islame”, z. Arben Halluni ka bërë një përshkrim të udhëtimit 10 vjeçar të gazetës së parë të një myftinie në historinë e aktivitetit të KMSh që nga krijimi i tij. Ka vlerësuar mesazhet e dijes, besimit dhe moralit që janë përcjellë në faqet e saj, numër pas numri, duke krijuar një realitet të shkruar, që dëshmon përherë e më tepër vlerat dhe madhështinë e Thirrjes Islame.
           
Shkrimtari Xhahid Bushati, në referatin e tij me temë: “Gjurma dhe Memoria në faqet e një Buletini”, ka analizuar daljen e 2 numrave të parë të botimit më të ri të Myftinisë Shkodër, “Buletin”.

Nëpërmjet një shfletimi të detajuar të dy numrave të tij, ka nxjerrë në pah rëndësinë që ka arkivimi i aktiviteteve dhe zhvillimeve të ndryshme për një institucion si Myftinia Shkodër. Njëkohësisht ka vënë theksin te mesazhet që përcjell ky botim në shërbim të informimit të besimtarëve dhe lexuesit në përgjithësi me realitetin dhe zhvillimet e Myftinisë Shkodër.
           
Aktiviteti ka kulmuar me nderimin e 10 kontribuuesve më të afirmuar në këtë 10 vjetor të gazetës “Udha Islame”, të cilët janë vlerësuar me “Mirënjohje” nga Myftinia Shkodër.           

Më pas, për të ftuarit është shpërndarë numri i ri i gazetës “Udha Islame”, dy numrat e ri të “Buletin” dhe libri “Bibliografi “Udha Islame” 50 numrat e parë”. Në një kafe të përbashkët, janë këmbyer urime dhe lutje për mbarësinë dhe suksesin e mëtejshëm të gazetës dhe stafit të saj.