Për të dytën javë me radhë, të xhumanë, më 7 dhjetor 2012, Myftiu i Shkodrës Imam Muhamed Sytari ka vazhduar të flasë mbi rolin e madh të hoxhallarëve shkodranë e atyre shqiptarë në shërbim të vlerave islame e atyre kombëtare në shekuj.
               
Në hytben e kësaj jave, Myftiu është ndalur te roli dhe kontributi i hoxhallarëve për krijimin e bibliotekave dhe rolin e tyre në mbrojtje të Shkodrës nga sulmet serbo-malazeze.
               
Myftiu ka theksuar se kur përmenden hoxhallarët, është e pamundur të mos të shkojë ndër mend libri, bibliotekat  dhe dorëshkrimet e shumta e me vlera shkencore. Myftiu ka thënë se imazhi i hoxhallarëve tanë nuk është ai, që të pafetë u kanë shitur dhe vazhdojnë t’u shesin shqiptarëve. Gjithashtu ka theksuar se rinia e sotme duhet ët dijë dhe të mësojë se hoxhallarët janë zotërinjtë e këtij vendi, mësuesit, edukatorët dhe nxitësit për mirë, për moral, dije dhe udhëzim në jetë.               

Më pas, ka përmendur shembuj të ndryshëm, ku është ndalur edhe te kontributi i hoxhallarëve në mbrojtje të Shkodrës, gjatë luftërave të ndryshme kundër pushtuesve. Këtu ka përmendur shembullin e Hafiz Ibrahim Repishtit, për ët cilin ka përmendur se: “ai i takonte breznisë së luftës për mbrojtjen e Shkodrës (1912-13) dhe se ishte pjesë e kompaktësisë shkodrane të atyne viteve. (Ai ka kalue shtatë muej në llogoret e frontit të Shtojit, dhe familja Repishti ka furnizue me ushqim e armatim 17 vullnetarë të kompanisë që ai komandonte gjatë të gjithë luftës). Ma vonë, me 1916, kur Austro-Hungaria filloi keqtrajtimin e qytetarëve shkodranë, ai ka marrë pjesë në demonstratat anti-austriake, dhe ashtë burgosë me nji grup qytetarësh. Ka luejtë nji rol aktiv në mobilizimin dhe organizimin e Luftës se Koplikut (1920), për gjashtë muej. Në ato vite, ka ndihmue aktivisht Komitetin për Mbrojtjen e Kosovës (Hoxha Kadriu dhe shokët kanë ba disa nga mbledhjet e Komitetit në shtëpinë e babës), ka marrë pjesë aktive në politikën e forcimit të vendit, dhe në dhetor 1923 asht zgjedhë deputet i Shkodrës (grupi i Opozitës kundër Ahmet Zogut).”