Paraditën e së enjtes, më 6 dhjetor 2012, në ambientet e xhamisë së Parrucës, është zhvilluar një takim pune i Myftiut me imamët e Myftinisë Shkodër.

Gjatë këtij takimi është diskutuar për shumë çështje që lidhen me aktualitetin dhe kërkesat e shumta legjitime, me të cilat Myftinia Shkodër i është drejtuar Këshillit të Bashkisë Shkodër dhe institucioneve të tjera, por që akoma nuk kanë marrë përgjigjen e duhur.

Myftiu ka folur fillimisht për domosdoshmërinë e studimit të jetës dhe veprës së hoxhallarëve të Shkodrës, si dhe evidentimin e mëtejshëm të gjurmëve diturore të lëna prej tyre. Ai ka lënë detyrë trajtimin e bisedave fetare, hytbeve të ardhshme etj, në funksion të këtij qëllimi. Në këtë pikë, Myftiu nuk ka lënë pa përmendur faktin e hidhur të neglizhencës dhe lënies në hije të kontributit të hoxhallarëve shqiptarë nga politika, me rastin e 100 vjetorit të Shqipërisë.

Gjatë takimit është diskutuar gjatë edhe rreth kërkesës së përsëritur të Myftinisë për ndryshimin e emërtimit të disa rrugëve, sidomos aty ku duhet ndërhyrë për saktësimin e emrave të hoxhallarëve të nderuar të qytetit. Janë dhënë sqarimet e duhura rreth çështjes së sheshit “Harmonia” dhe është kërkuar që të sensibilizohen xhematet me qetësi, objektivizëm dhe me argumente në lidhje me këtë kërkesë më se legjitime. Myftiu ka theksuar se nuk ka asnjë arsye se përse kjo kërkesë nuk prezantohet në rend dite në mbledhjet e Këshillit të Bashkisë Shkodër.

Imamët me këshillat e xhamive dhe xhemate janë lajmëruar për disa aktivitete kulturore dhe shkencore që do të zhvillohen gjatë këtij muaji, në shërbim të nderimit të personaliteteve islame të qytetit, si dhe përkujtimi i datave të shënuara, si 10 vjetori i gazetës “Udha Islame” etj.

Myftiu ka vënë në dijeni imamët se Myftinia Shkodër po punon për organizimin e një konference islame mbi rregullat e tolerancës ndërfetare, rregullat e sjelljes së muslimanit me jomuslimanin, kufijtë e dialogut ndërfetar etj. Është kërkuar që imamët teologë të paraqesin në Myftini temat shkencore dhe mendimet e tyre, në funksion të këtij qëllimi.

Është diskutuar edhe në lidhje me tematika të ndryshme që kanë të bëjnë me jetën fetare në Shkodër dhe rolin elitar të imamëve dhe Myftinisë Shkodër në këtë drejtim.