Ditën e mërkurë, më 28 nëntor 2012, Myftiu i Shkodrës Imam Muhamed Sytari ka pritur në një vizitë të përzemërt një delegacion qeveritar nga Departamenti i Çështjeve Fetare të Emirateve të Bashkuara Arabe. Delegacioni kryesohej nga Dr. Omer Hatibi, shoqëruar nga z. Muhamed Muhairi dhe z. Abdullah Abdulxhebbar.
 
Gjatë bashkëbisedimit, Myftiu i ka njohur vizitorët me aktivitetin e Myftinisë Shkodër dhe disa nga projektet e saj, që presin bashkëpunimin me partnerët e ndryshëm, me të cilët ndajmë qëllimet dhe dëshirat e mira për lulëzimin e mëtejshëm të Thirrjes Islame në këtë vend.
 
Vizitorët janë njohur edhe me botimet e Myftinisë Shkodër, si “Buletini” i përvitshëm dhe gazeta “Udha Islame”. Myftiu i ka njohur vizitorët se shumë shpejt Myftinia Shkodër po përgatitet për botime të reja në shërbim të besimtarëve dhe ecurisë së shëndetshme të kësaj Myftinie.
 
Myftiu i ka njohur vizitorët edhe me rolin e madh që ka Myftinia Shkodër në edukimin e besimtarëve me frymën e harmonisë ndërfetare, duke pasur parasysh se në Shkodër dhe në Shqipëri ekzistojnë edhe komunitete të tjera fetare. Myftiu ka theksuar se në kuadër të kësaj dëshmie, Myftinia Shkodër i ka propozuar autoriteteve lokale që sheshi kryesor i qytetit të Shkodrës të marrë emrin “Harmonia”, si dëshmi e këtij shpirti të pastër të harmonisë dhe bashkëjetesës, që nuk duhet prekur nga askush.
 
Nga ana e tyre vizitorët kanë shprehur kënaqësinë e tyre për këtë vizitë disa ditore në Shqipëri, ku po njihen me realitetin e Thirrjes Islame dhe aktivitetit islam.
 
Më pas, së bashku, ata kanë vizituar xhamitë kryesore të Shkodrës dhe janë takuar me imamët dhe teologët e nderuar që shërbejnë në këto xhami.
 
Për nder të vizitorëve nga Emiratet e Bashkuara Arabe, Myftiu ka shtruar një drekë vëllazërore.