Paraditën e së mërkurës, më 28 nëntor 2012, me rastin e ditës së 100 vjetorit të ngritjes së flamurit në Vlorë dhe datëlindjes së 100-të të Shqipërisë tonë të shtrenjtë, Myftinia Shkodër ka marrë pjesë në ceremonitë e zhvilluara në këtë ditë nga Bashkia Shkodër.
 
Fillimisht, Myftiu me bashkëpunëtorë ka marrë pjesë në ceremoninë e ngritjes së flamurit në sheshin para Bashkisë Shkodër. Në një intervistë për Tv1 Channel, nga sheshi i Bashkisë, Myftiu Imam Muhamed Sytari ka vlerësuar se kjo është një ditë e madhe dhe një datë e shtrenjtë për shqiptarët. Ai është lutur që Zoti ta begatojë Shqipërinë dhe t’i udhëzojë shqiptarët drejt dritës së Tij.
 
Më pas, Myftiu me imamë dhe një grup qytetarësh dhe intelektualësh shkodranë, kanë bërë homazhe te përmendorja e komandantit të shquar, Mbrojtësit të Shkodrës , Hasan Riza Pasha.
 
Me këtë rast, Myftiu ka vlerësuar trimërinë dhe guximin e shkodranëve të ndershëm, që nën drejtimin e komandantit burrëror Hasan Riza Pasha, luftuan kundër rrethimit të serbo-malazezëve në vitin 1913. Ata kanë kënduar një “Fatiha” për shpirtrat e dëshmorëve të Shkodrës dhe komandantit të nderuar Hasan Riza Pasha.
 
Myftiu ka zhvilluar edhe një vizitë në zyrën e Kryetarit të Bashkisë Shkodër, z. Lorenc Luka, të cilin e ka uruar me rastin e 100 vjetorit dhe është lutur për mbarësinë e qytetarëve të Shkodrës dhe të ardhmen e tyre.