Paraditën e së martës, më 27 nëntor 2012, Myftinia Shkodër ka organizuar një konferencë shkencore-fetare, për të vlerësuar kontributin jetik të hoxhallarëve të shquar të Shkodrës ndër shekuj, në shërbim të shoqërisë shqiptare dhe vlerave tona kombëtare.
 
Në fjalën e tij të hapjes, teologu Arben Halluni ka vlerësuar se në prag të ditës së 100 vjetorit të shtetit shqiptar dhe ngritjes së flamurit kombëtar, organizohet kjo konferencë për të vlerësuar rolin e madh dhe kontributin e shquar të hoxhallarëve të ditur e të përkushtuar të Shkodrës, në edukimin e brezave me dashuri për fenë e Zotit dhe shërbimin e sinqertë për atdheun e shtrenjtë.
 
Referati kryesor i kësaj konference është mbajtur nga Myftiu i Shkodrës Imam Muhamed Sytari, në të cilin ka nxjerrë në pah kontributin e hoxhallarëve të shquar të Shkodrës ndër shekuj në shërbim të interesave të popullit dhe besimtarëve në përgjithësi.
 
Është vlerësuar kontributi i hoxhallarëve për krijimin e abetareve shqip me alfabet arab, alfabeti më i shquar i kohës, roli i tyre në mbrojtje të Shkodrës nga agresioni serbo-malazez, drejtimi i tyre me kompetencë i shkollave shtetërore në Shkodër, qëndresa ndaj dhunës komuniste, zotërimi i tyre i gjuhëve të huaja dhe i bibliotekave madhështore etj.
 
Aktivitetin e ka përshëndetur edhe Myftiu i Malësisë së Madhe, H. Edmir Smajlaj, që ka vlerësuar se dashuria për atdheun dhe kombin i ka rrënjët në Kur’an dhe në traditën e hz. Muhammedit (a.s). Ai ka uruar shqiptarët për këtë 100 vjetor dhe është lutur për një Shqipëri më të fortë e më të përparuar.
 
Për të pranishmit janë ekspozuar edhe disa gjurmë të vjetra të hoxhallarëve të Shkodrës, si dhe është shpërndarë numri i ri gazetës “Udha Islame”, ku në faqe të parë të saj është vendosur flamuri kombëtar i shpalosur mbi ballinën e xhamisë së Parrucës.

Myftinia Shkodër uron të gjithë shqiptarët:

 “GËZUAR 100 VJETORIN E NGRITJES SË FLAMURIT
 DHE ZOTI E MBROJTË SHQIPËRINË NGA AFETARIZMI
 DHE LARGIMI NGA MORALI I FESË SË TIJ”