Paraditën e së hënës, më 19 nëntor 2012, Myftiu i Shkodrës Imam Muhamed Sytari ka zhvilluar një inspektim për të parë nga afër arritjet e punimeve për ndërtimin e xhamisë së re në fshatin Kuç të komunës Guri i Zi.
 
Gjatë këtij inspektimi, Myftiu është njohur me arritjet e larta dhe punimet me cilësi dhe brenda afatit, për përfundimin e kësaj xhamie të re. Është konstatuar se punimet janë afruar fundit dhe se xhamia e re mund të jetë e gatshme për të ofruar shërbesat e ndryshme fetare para afateve të pritura.
 
I shoqëruar edhe nga menaxheri i pronave të Myftinisë Shkodër, z. Blendi Alushi, Myftiu ka shprehur kënaqësinë e tij dhe gëzimin për situatën e deritanishme në xhaminë e re të Kuçit, si dhe ka falënderuar stafin që është angazhuar për ndërtimin e kësaj xhamie për korrektësinë dhe cilësinë e punimeve.
 
Ceremonia për hedhjen e themeleve të kësaj xhamie të re u zhvillua më 28 maj 2012 dhe së shpejti pritet inaugurimi i xhamisë së re në fshatin Kuç.