Paraditën e së enjtes, më 8 nëntor 2012, Myftiu i Shkodrës Imam Muhamed Sytari, ka pritur në një takim të përzemërt e vëllazëror, Myftiun e Iskenderunit (Turqi), H. Hamdi Kavillioğlu, që shoqërohej nga atasheu turk në Tiranë, z. Shaban Ishlek.
 
Gjatë takimit është folur mbi bashkëpunimin e dy myftinive, ku Myftiu i Iskenderunit ka lajmëruar Myftiun e Shkodrës për angazhimin e institucionit të tij për nisjen sa më shpejt të ndërtimit të një xhamie të re në Zonën e Shkodrës, atë të fshatit Barbullush, si pjesë e bashkëpunimit të nisur që vitin e shkuar.
 
Ndërkohë atasheu turk në Tiranë, z. Shaban Ishlek, ka vlerësuar se ndërtimi i kësaj xhamie është pjesë e bashkëpunimit dhe binjakëzimit që myftini të ndryshme në Turqi kanë me myftini në Shqipëri. Ai ka theksuar se kjo frymë e bashkëpunimit duhet konsoliduar dhe ruajtur në shërbim të besimit dhe lartësimit të fesë së Zotit.
 
Bisedat në mes të dy myftive kanë vijuar edhe në lidhje me çështje të tjera që kanë të bëjnë me organizimin e jetës fetare dhe aktivitetin e dy myftinive. Me këtë rast, Imam Muhamed Sytari e ka lajmëruar Myftiun e Iskenderunit se me 16 nëntor 2012, muslimanët e Shkodrës përkujtojnë 22 vjetorin e rihapjes së xhamisë së Plumbit, një datë e shënuar për krejt muslimanët shqiptarë.
 
Për nder të mikut nga Turqia, Myftiu i Shkodrës ka shtruar një drekë vëllazërore, pas së cilës është kryer edhe një vizitë në xhaminë aktuale të Barbullushit.