Mbrëmjen e së martës, më 6 nëntor 2012, pas namazit të akshamit, Myftiu i Shkodrës Imam Muhamed Sytari ka zhvilluar një takim me medresistët që jetojnë në konviktin e Medresesë “Haxhi Sheh Shamia”, dega djem.
 
Në fjalën e tij, para medresistëve, Myftiu është përqendruar te mirësia e udhëzimit, besimit dhe dijes. Ka thënë se koha është në favor të atyre që e kërkojnë dijen me sinqeritet për Zotin. Njëkohësisht ka kërkuar nga medresistët që të shfrytëzojnë kohën, shëndetin dhe dijen e dobishme që marrin ditë pas dite, për të ecur përpara në jetë si individë të shëndetshëm, që e duan Zotin dhe i frikësohen Atij.
 
Gjatë fjalës së tij, Myftiu ka përmendur edhe faktin se rinia e sotme ka nevojë për Zotin dhe dashurinë e Tij, për të jetuar në paqe dhe në prehje shpirtërore. “Çfarë alternative ka në jetën e dikujt që i ka kthyer shpinën Zotit, a që nuk e ka gjetur rrugën e duhur drejt Tij? Ndërkohë ju, falë Zotit, jeni në rrugën e duhur për të mësuar dhe për t’u thelluar në dashurinë e Tij!”- ka thënë Myftiu.
 
Pas fjalës dhe këshillave të dhëna, Myftiu i është përgjigjur edhe pyetjeve që medresistët i kanë drejtuar në lidhje me çështje të ndryshme që lidhen me jetën e përditshme dhe marrëdhënien me Zotin.