Në atmosferën e ngrohtë të Festës së Kurban Bajramit, ditën e xhuma, më 26 tetor 2012, Myftiu i Shkodrës Imam Muhamed Sytari ka mbajtur hytben e xhumasë në xhaminë e Kirasit.
           
Në fjalimin e hytbes së mbajtur me këtë rast, Myftiu ka folur mbi shembullin e Hz. Ibrahimit (a.s) dhe atë të Hz. Muhammedit (a.s), të cilët janë dy profetët e vetëm shembulltyrën e të cilëve jemi urdhëruar ta ndjekim në mënyrë më të theksuar në Kur’an.
           
Gjatë hytbes, Myftiu ka bërë disa krahasime nga jeta e secilit prej dy profetëve më të mëdhenj të historisë së njerëzimit, duke theksuar se ka ardhur koha që muslimanët shqiptarë të ecin në shembullin e duhur në mbrojtje të identitetit të tyre, shembullit besimor dhe krenarisë së të qenurit muslimanë.
           
Myftiu ka thënë se Kurban Bajrami është një ngjarje e mrekullueshme që na bën të reflektojmë me veten, duke na bërë të analizojmë nivelin e besimit, sjelljen dhe veprën dhe a shkojnë ato sipas pëlqimit të All-llahut apo jo.           

Ndërkohë, në hytben e dytë, është ndalur edhe te problemi i madh i vakëfit të zaptuar të kësaj xhamie, ku ka konfirmuar edhe një herë angazhimin e Myftinisë Shkodër për të kthyer në origjinën e duhur çdo pëllëmbë vakëf të zaptuar, duke mos toleruar asnjë rast.