Mbrëmjen e së enjtes, më 25 tetor 2012, Myftiu i Shkodrës Imam Muhamed Sytari ka qenë i ftuar i gazetarit Simon Shkreli në emisionin e tij të përjavshëm “Hapur”, në Tv1 Channel.
           
Për më se një orë, gazetari ka bashkëbiseduar me Myftiun, duke u përqendruar te disa tema që lidhen kryesisht me vlerën e festave fetare, fenomenet negative me të cilat po përballet shoqëria shqiptare këto ditë, fenomenin e gjakmarrjes, propozimin e Myftiut drejtuar Këshillit Bashkiak Shkodër që sheshi kryesor i qytetit të marrë emrin “Sheshi Harmonia”, për marrëdhëniet ndërfetare dhe harmoninë në Shkodër, mbi festimin e Kurban Bajramit në dy ditë etj.
           
Gjatë këtij bashkëbisedimi Myftiu ka bërë thirrje që edukata fetare të bëhet pjesë e arsimit fillor dhe të ketë një lëndë të posaçme në shkollat shqiptare, si shembulli i shkollave në Evropë. Myftiu ka thënë se ajo që ndodh ditë pas dite në Shqipëri tregon më së miri nevojën që ka kjo shoqëri për besimin në Zotin dhe frikën ndaj Tij, që duhet t’u injektohet fëmijëve që në shkollën fillore.
           
Myftiu ka përmendur se fenomenet e shumta negative që kanë përfshirë shoqërinë shqiptare janë rezultat i një fryme ateiste të çmendur, me të cilën shqiptarët janë bombarduar për dekada të tëra dhe prej së cilës e kanë të vështirë të pastrohen nëse feja dhe edukimi fetar nuk merr vendin që i takon në këtë shoqëri.
           
Myftiu ka folur edhe për gjakmarrjen, ku ka theksuar se muslimanët e kanë shembullin më të mirë për të falur e për të mëshiruar, duke iu referuar profetit Muhammed (a.s), i cili dha shembullin e tij personal duke falur gjakun e axhës së tij.
           
Duke folur mbi propozimin e tij që sheshi kryesor i Shkodrës të ketë emrin “Sheshi Harmonia”, Myftiu ka theksuar se në këtë 100 vjetor të Shqipërisë, është momenti i duhur që drejtuesit e këtij vendi të tregojnë respektin dhe nderimin e tyre për drejtuesit fetarë dhe misionin e tyre, duke e dëshmuar këtë me fakte konkrete, si në miratimin e propozimit të lartpërmendur. Myftiu ka thënë se propozimi për sheshin në fjalë i shërben vlerave kombëtare dhe harmonisë fetare në vend, sikurse bëhet një shembull tërheqës edhe për vizitorët nga jashtë vendit tonë.           

Në fund, Myftiu i është përgjigjur gazetarit edhe për festimin e bajramit në dy ditë, duke theksuar se media të caktuara, duke qenë edhe injorante e nocioneve teologjike e fetare, kanë ngjallur panik ndër njerëz për një fenomen që nuk u shfaq sot për herë të parë as të fundit, por që gjithsesi duhet të zgjojë vëmendjen e muslimanëve në botë drejt gjetjes së rrugëve për anashkalimin e tij.