Paraditën e së enjtes, më 25 tetor 2012, në ambientet e xhamisë së Parrucës, Myftiu i Shkodrës Imam Muhamed Sytari ka pritur vizitat tradicionale me rastin e Festës së Kurban Bajramit.
           
Gjatë saj, Myftiu së bashku me imamët dhe drejtuesit e dy medreseve të qytetit, kanë marrë urimet më të përzemërta nga besimtarë të shumtë, autoritete fetare të qytetit, drejtues vendorë dhe lokalë etj.
           
Gjatë këtyre vizitave është folur mbi atmosferën e begatë që pasqyron Kurban Bajrami, në bërjen e kurbaneve, në ndihmën ndaj nevojtarëve, në vizitat familjare e ato shoqërore, në nxitjen e harmonisë dhe vëllazërisë në shoqëri etj.
           
Myftiu ka pritur edhe një grup arsimtarësh dhe intelektualësh nga Turqia, të cilët kanë shprehur njëkohësisht edhe kënaqësinë e pjesëmarrjes në ceremoninë e faljes së Kurban Bajramit në shesh, si një eksperiencë shumë e bukur për ta dhe një kujtim i veçantë nga vizita në Shkodër.           

Në përfundim të pritjes tradicionale me rastin e Kurban Bajramit, në një intervistë për Tv1 Channel, Myftiu i Shkodrës ka falënderuar gazetarët që kanë ndjekur me seriozitet dhe profesionalizëm ceremoninë e Kurban Bajramit dhe pritjen e vizitave, sikurse është lutur për besimtarët dhe qytetarët e Shkodrës për një të ardhme më të dritshme, plot besim e harmoni.