Shkodër, më 24 tetor 2012
           

Të dashur vëllezër dhe motra,
           
Ka ditë që ne dhe mbarë bota islame, kemi hyrë në atmosferën e 10 ditëve të begata, për të cilat All-llahu i Madhëruar është betuar në Kur’an. Këto ditë finalizohen me Kurban Bajramin, festën e sakrificës së njeriut në rrugën e ruajtjes së besimit dhe identitetit të tij.
           
Nëpërmjet këtij mesazhi, dua të përcjell tek ju urimet dhe lutjet më të mira për një kthim të sinqertë nga Zoti dhe mësimet e Tij, sidomos në këto ditë, kur shoqëria shqiptare është prekur nga fenomene dhe ngjarje që dëshmojnë largimin nga rruga e Zotit dhe rrëshqitjen drejt greminave të injorancës dhe femohimit.
           
Këto ditë të madhnueshme, ku vepra e mirë shumëfishohet në peshoren e Zotit, duhet të na shërbejnë për t’u kthyer nga drita e besimit, për ta dëshmuar dashurinë e All-llahut në jetën tonë, për ta gjetur prehjen në udhëzimin e Tij të plotë, për të jetuar në harmoni me tjetrin, për të kërkuar përherë pëlqimin e Zotit në fjalët dhe veprat tona.
           
Këtë vit, për ne muslimanët shqiptarë, kjo Festë e madhnueshme ka një kuptim edhe më të veçantë nga vitet e tjera, pasi vjen në prag të 100 vjetorit të Shqipërisë sonë të shtrenjtë. Për këtë, le t’i lutemi Zotit për vendin tonë të dashur, që të ketë përherë përparim e dritë. Për familjen shqiptare, që të ketë mbrojtjen dhe bekimet e Zotit. Për individin shqiptar, që të jetojë me dashurinë dhe frikën e Zotit në këtë botë. Për shpirtrat e shqiptarëve të mirë, që me besim në Zotin kontribuan për të mirën e kësaj toke, t’i mëshirojë Zoti. Për të ardhmen e fëmijëve tanë, që të rriten me besim në Zotin, jo me brumin e një ateizmi të çmendur, pasojat e të cilit i përjetojmë ditë pas dite, ne dhe shoqëria e jonë. Për rininë shqiptare, që të gjejë rrugën e udhëzimit hyjnor, jo devijimin moral e intelektual në emër të lirisë.
           
Ditët e Kurban Bajramit, sjellshin me vete prehje shpirtërore, qetësi dhe mirësi hyjnore për shqiptarët e lodhur nga rropatjet e hutuara drejt një të ardhmeje të panjohur e të mjegullt.
           
Kurban Bajrami është të dëshmohemi si muslimanë, të veprojmë si të tillë, të jetojmë me besimin dhe fenë tonë, pa u tunduar nga e sotmja, pa u frikësuar nga e kaluara, pa u trembur nga e ardhmja në një realitet gjeo-politik, në të cilin ne kemi shumë për të dhënë, me dashuri, dije e harmoni!
           
Gëzuar!