Ditën e xhuma, më 20 korrik 2012, Myftinia Shkodër ka shtruar iftarin e natës së parë  të Ramazanit 1433, për banorët e “Shtëpisë së Moshuarve” Shkodër.
           
Në mesazhin e tij para mediave dhe para të pranishëmve, Myftiu Imam Muhamed Sytari ka theksuar se iftari i parë i këtij Ramazani është programuar të jetë për azilantët e “Shtëpisë së Moshuarve”, pasi ata janë nëna të shtrenjta dhe baballarë fisnikë, që kanë nevojë për mbështetje dhe afrim.
           
Myftiu ka apeluar njerëzit vullnetmirë dhe biznesmenët muslimanë, që të tregohen bujarë dhe të kontribuojnë për më të mirën e këtyre të moshuarve që kanë nevojë për ndihmë dhe asistencë, sidomos në këtë fillim Ramazani. “Këta nëna dhe baballarë janë amanet i Zotit për ne, amanet për Shkodrën, prandaj të gjithë jemi të obliguar të kontribuojmë sa të kemi mundësi për ta”- ka thënë Myftiu.
           
Ai ka vlerësuar se respekti dhe nderimi ndaj prindërve në Islam, është një rrugë e sigurtë që të shpie drejt xhennetit.           

Më pas, në një atmosferë të ngrohtë, është konsumuar iftari i parë i këtij Ramazani, i shoqëruar me lutjet karakteristike të tij.