Pasditën e së shtunës, më 20 tetor 2012, në prag të Kurban Bajramit, Myftiu i Shkodrës Imam Muhamed Sytari, ka thirrur në një takim pune, imamët e qytetit të Shkodrës, ata të Postribës dhe teologët e Këshillit të Myftinisë Shkodër.
           
Qëllimi i këtij takimi ka qenë konsultimi në lidhje me ditën e Kurban Bajramit dhe programeve që e pasojnë atë.
           
Pas diskutimeve të gjata, Myftiu dhe imamët kanë rënë dakord që dita e parë e Kurban Bajramit, sipas kalendarit të unifikuar të Komunitetit Mysliman të Shqipërisë dhe Bashkësive Islame të Kosovës dhe Maqedonisë, të jetë të enjten, më 25 tetor 2012.
           
Është rënë dakord që namazi i sabahut dhe ceremonia e Kurban Bajramit të zhvillohen në sheshin bri xhamisë “Ebu Bekër”, si një traditë tashmë e konfirmuar dhe e përsëritur në bajramet e viteve të fundit.
           
Është caktuar që namazi i sabahut do të falet në orën: 6.45. Më pas, për rreth një orë, imamë dhe teologë të Shkodrës do të mbajnë biseda fetare rreth vlerës së besimit, kurbanit dhe haxhit. Në orën: 7.45, do të bëhet falja e Kurban Bajramit dhe do të mbahet hytbeja e tij.
           
Pritja tradicionale e Kurban Bajramit, për autoritetet dhe besimtarët, do të bëhet në xhaminë e Parrucës, në hapësirën kohore 10.00 – 11.30.           

Myftinia Shkodër ju uron: GËZUAR KURBAN BAJRAMIN!