Mesnatën e së xhumasë, më 19 tetor 2012, Myftiu i Shkodrës, imamët e xhamive kryesore të qytetit dhe fshatit, besimtarë dhe familjarë të ndryshëm, kanë marrë pjesë në ceremoninë e përcjelljes së haxhilerëve shkodranë të këtij viti.
           
Me këtë rast, para nisjes, Myftiu i Shkodrës ka mbajtur një përshëndetje të ngrohtë, ku ka porositur haxhilerët që të përfitojnë sa më tepër gjatë këtij udhëtimi, të kenë durim dhe të shfrytëzojnë kohën për të arritur kënaqësitë e këtij adhurimi.
           
Myftiu i ka prezantuar haxhilerët edhe me shoqëruesin e tyre në këtë udhëtim, teologun e nderuar z. Lauren Luli, i cili është ngarkuar nga Komuniteti Mysliman i Shqipërisë, së bashku me disa myftilerë dhe imamë të nderuar, për shoqërimin e haxhilerëve shqiptarë në haxhin e këtij viti.
           
Haxhilerët i ka përshëndetur edhe Kryetari i Këshillit të Qarkut Shkodër, z. Maxhid Cungu. Në fjalën e tij, z. Cungu ka shprehur urimet e tij më të mira për grupin e haxhilerëve të Qarkut Shkodër, duke shpresuar që ky udhëtim të jetë sa më i mbarë dhe të kthehen shëndosh e mirë, me begatimet e haxhit.
           
Në prag të nisjes, Myftiu ka bërë një duá, ku është lutur për haxhilerët e Shkodrës dhe të Shqipërisë, për një haxh të pranuar dhe të begatë.
           
Në mesnatë, haxhilerët e Shkodrës janë nisur drejt Prishtinës, prej ku do të fluturojnë drejt Xheddas e më pas drejt Mekkës, për të nisur ritualet e haxhit të këtij viti.Rrugë të mbarë të dashur haxhilerë të Shkodrës, të mbarë Shqipërisë!