Për tre netë me radhë, në datat 11-12-13 tetor 2012, Myftinia Shkodër ka organizuar një trajnim fetaro-kulturor për 32 haxhilerët e rinj të këtij viti që do të udhëtojnë nga Shkodra drejt vendeve të shenjta për kryerjen e ritualeve të haxhit.
           
Për tre netë me radhë, pas namazit të akshamit në xhaminë e Parrucës, teologu Ylli Buraniqi ka dhënë udhëzimet dhe shpjegimet e duhura për vizitorët nga Shkodra, të vendeve të shenjta, për haxhin e këtij viti.
           
Gjatë këtij trajnimi, haxhilerët e rinj janë informuar me kushtet e haxhit dhe të umres, rregullat që duhen ndjekur e zbatuar, ndalesat e haxhit dhe çështjet e ndryshme fetare që lidhen me kryerjen e këtij adhurimi të madh.
           
Njëkohësisht, janë bërë edhe praktikime konkrete, duke provuar njohuritë dhe mësimet e fituara gjatë këtij trajnimi të vyer tre ditor.
           
Mbrëmjen e së shtunës, atë të mbylljes, i pranishëm ka qenë edhe Myftiu i Shkodrës Imam Muhamed Sytari. Në fjalën e tij para të pranishëmve, pasi ka falënderuar imamin e xhamisë Kiras, teologun Ylli Buraniqi për kontributin e tij dhe udhëzimet e dhëna gjatë këtyre tre netëve, ka theksuar se ky është viti i dytë që Komuniteti Mysliman i Shqipërisë organizon udhëtimin, udhëzimin dhe sistemimin e haxhilerëve shqiptarë në mënyrën më të mirë të mundshme. Ka theksuar se gjatë këtij udhëtimi të veçantë, haxhilerët do të kenë udhërrëfyes të përzgjedhur nga K.M.Sh, për lehtësimin e kryerjes me sukses të haxhit.           

Njëkohësisht, ka lajmëruar se ditën e xhuma, më 19 tetor 2012, do të bëhet shpërndarja e pasaportave dhe ihrameve për haxhilerët shkodranë të këtij viti, menjëherë pas faljes së namazit të xhumasë në xhaminë e Parrucës. Ndërkohë, nisja e tyre do të bëhet po atë ditë, nga xhamia e Parrucës, në orën 22.00.