Pasdrekën e së shtunës, më 13 tetor 2012, në fshatin Trush, komuna Bërdicë, është zhvilluar ceremonia e hedhjes së themeleve për xhaminë e re të kësaj xhamie.
           
Pas faljes së namazit të mesditës në xhaminë ekzistuese, të pranishmit kanë dalë në sheshin e vakëfit të kësaj xhamie për të ndjekur ceremoninë e hedhjes së themeleve të xhamisë së re.
           
Pasi i ka uruar mirëseardhjen të pranishëmve dhe të ftuarve të nderit, imami i kësaj xhamie, z. Jetmir Braqi, ka theksuar se kjo është një ditë e gëzuar për krejt banorët e Trushit, që do të pajisen me një xhami të re e bashkëkohore.
           
Më pas kanë përshëndetur Kryetari i Komunës Bërdicë, z. Besnik Brahimi, Myftiu i Shkodrës, Imam Muhamed Sytari, Drejtori i shoqatës ALSAR, ndërmjetësuese për sponsorizimin e xhamisë së re, z. Mehdi Gurra, Atasheu turk, z. Shaban Ishlek, Kryetari i Këshillit të Qarkut Shkodër, z. Maxhid Cungu etj., të cilët kanë ndarë gëzimin dhe nderin e pjesëmarrjes në këtë ditë të shënuar për besimtarët dhe komunitetin e kësaj zone. Në fjalët e tyre është vlerësuar roli i xhamisë, i Myftinisë Shkodër dhe i shoqatave bamirëse për ndërtimin e urave vëllazërore në shoqëri dhe edukimin e brezave me frikën e Zotit dhe dëshirën për të ndërtuar, larg të keqes.           

Ndonëse në një atmosferë me rreshje të dendura shiu, të pranishmit kanë ndjekur me shumë emocion ceremoninë dhe kanë ndarë kënaqësinë e hedhjes së themeleve për ndërtimin e xhamisë së re, e cila do të ketë një kapacitet prej 400 vendesh dhe do të ndërtohet sipas një arkitekture osmane, duke qenë e para xhami në Shqipëri me një projekt të tillë.