Pasditën e së mërkurës, më 10 tetor 2012, Myftinia Shkodër ka zhvilluar ceremoninë e fillimit të edicionit të parë të Kupës “Vllaznimi”, në mes të xhemateve të xhamive të zonës Postribë.
           
Ky aktivitet vjen në kuadër të organizimit të sektorit të rinisë islame në Myftininë Shkodër, në prag të Festës së Kurban Bajramit, në bashkëpunim me imamët e nderuar të zonës Postribë.
           
I pranishëm në këtë aktivitet ka qenë edhe Myftiu i Shkodrës Imam Muhamed Sytari, i cili ka përshëndetur të pranishmit. Myftiu ka uruar që aktivitete të tilla të jenë shkak i shtimit të harmonisë dhe vëllazërisë dhe i angazhimit të rinisë islame për të qenë model në shoqëri.
           
Myftiu ka falënderuar angazhimin e imamëve të nderuar të zonës Postribë, Shkëlqim Sykaj, Ruzhdi Plangaj, Agim Hoxha, Fitim Karmaj, Indrit Plangaj etj, që janë bërë shembull i harmonisë dhe i edukimit të rinisë me vlerat e besimit dhe fesë islame.
           
Aktivitetin e ka përshëndetur edhe përgjegjësi i sektorit të rinisë në Myftininë Shkodër, teologu Ervil Kuçi dhe imamët e nderuar Shkëlqim Sykaj dhe Ruzhdi Plangaj, që kanë theksuar se këto aktivitete janë një domosdoshmëri në rrugën e shtimit të harmonisë, vëllazërisë dhe mirëkuptimit në mesin e rinisë islame të kësaj zone muslimane.            

Në edicionin e parë të Kupës “Vllaznimi”, marrin pjesë 28 ekipe, që do të zhvillojnë ndeshjet e tyre në një hark kohor prej dy javësh.