Ditën e shtunë, më 6 tetor 2012, Myftiu i Shkodrës Imam Muhamed Sytari ka pritur Kryetarin e Bashkësisë Islame të Prizrenit, Lutfi ef. Ballek dhe një grup imamësh dhe muezinësh të Prizrenit, në një vizitë vëllazërore në qytetin e Shkodrës.
           
Në një bashkëbisedim të ngrohtë me miqtë nga Prizreni, Myftiu ka ndarë kënaqësinë e takimit, duke theksuar se vizita të tilla e shtojnë harmoninë dhe bashkëpunimin, aq më shumë në mes të dy myftinive Shkodër e Prizren, që janë binjakëzuar që në 15 tetor 2011.
           
Myftiu i ka njohur miqtë edhe me aktivitetin e fundit të organizuar nga Komuniteti Mysliman i Shqipërisë në bashkëpunim me bashkësitë islame të trevave shqiptare, në përkujtim të kontributit të prijësve muslimanë të trevave shqiptare në 100 vitet e fundit. Njëkohësisht, është diskutuar edhe për botimin më të ri të K. M. Sh, enciklopedia e 100 personaliteteve të shquara të kulturës islame në trojet shqiptare.           

Imamët dhe muezinët nga Prizreni kanë vizituar edhe xhaminë e Parrucës dhe disa vende të tjera të spikatura të trashëgimisë islame në qytetin e Shkodrës, ku kanë marrë edhe shpjegimet e duhura nga Myftiu i Shkodrës.