Paraditën e së mërkures, më 3 tetor 2012, Myftiu i Shkodrës Imam Muhamed Sytari ka pritur në një takim të përzemërt e vëllazëror, bamirësin dhe mikun e nderuar nga Turqia, z. Rafet Bilaç.
           
Pasi i ka uruar mirëseardhjen në Shkodër, Myftiu i ka shprehur z. Bilaç mirënjohjen e tij personale dhe të Myftinisë Shkodër për angazhimet dhe kontributin e tij personal dhe të shoqatës “Istanbul” në shërbim të besimit, kulturës, arsimit dhe dijes në përgjithësi, në Shkodër dhe përtej saj.
           
Myftiu ka theksuar se Myftinia Shkodër është e interesuar që këto kontribute të vazhdojnë edhe më tej, me shërbime dhe projekte të reja, që i shërbejnë më së miri prezantimit sa më dinjitoz të Thirrjes Islame në qytetin e Shkodrës.
           
Nga ana e tij, z. Rafet Bilaç, i ka përcjellur Myftiut selamet dhe përshëndetjet e përzemërta të dijetarit dhe hoxhës së nderuar osman ef. Nuri Topbash, si dhe lutjet e sinqerta për mbarësi dhe suksese në drejtim të Myftinisë Shkodër.
           
Gjatë takimit është folur edhe për disa projekte kulturore dhe fetare, që ka Myftinia Shkodër, sidomos në shërbim të trashëgimisë islame të qytetit dhe hoxhallarëve të Shkodrës. Me këtë rast, Myftiu i ka dhuruar z. Rafet Bilaç edhe enciklopedinë më të re: “100 personalitete shqiptare të kulturës islame”, botim i Komunitetit Mysliman të Shqipërisë.           

Në këtë takim prezantonte edhe drejtori i shoqatës “Istanbul”, z. Ridvan Seferaj.