Në kuadër të 100 vjetorit të pavarësisë dhe me shkas përkujtimin e personaliteteve islame që luajtën një rol të jashtëzakonshëm në ndërtimin e profilit tonë kombëtar, nisi sot punimet në Tiranë, konferenca shkencore mbarëshqiptare: “Kontributi i prijësve myslimanë në formësimin e vetëdijes dhe identitetit tonë kombëtar”.
           
Pa dyshim që organizimi i kësaj konference përbën një lajm shumë të mirë për mbarë faktorin musliman shqiptar; është një aktivitet cilësor, që mbledh në Tiranë përfaqësuesit më të lartë të bashkësive dhe komuniteteve islame të trevave shqiptare. Është tregues i harmonisë, vëllazërisë dhe dëshirës së mirë për të dhënë një kontribut të vyer, një shembull të domosdoshëm dhe një thirrje të pastër drejt vlerave islame dhe shpirtit të tyre të pashoq.
           
Konferenca: “Kontributi i prijësve myslimanë në formësimin e vetëdijes dhe identitetit tonë kombëtar”, detyrimisht që do të shpalosë edhe një herë rolin e madh dhe elitar që kanë pasur hoxhallarët me besimin dhe botën e tyre, intelektualët muslimanë me cilësitë e tyre dhe aktivitetin shumëdimensional, në formësimin e vetëdijes tonë kombëtare, mbjelljen e frymës së harmonisë, mirëkuptimit dhe dashurisë së njeriut për vëllanë e tij njeri.
           
Konferenca në fjalë, është njëkohësisht një thirrje e pastër për prijësit e sotëm muslimanë, që të ecin në gjurmët e paraardhësve të tyre, duke kontribuar ditë pas dite për një shoqëri shqiptare më të disiplinuar me besim dhe dashuri për një atdhe të përbashkët, ku secili të ndërtojë, me aq sa ka mundësi, jo të shkatërrojë, në emër të lirive dhe të drejtave njerëzore.
           
Konferencës në fjalë i shton hijeshi dhe dritë gjurmësh që s’duhen harruar, edhe dalja dinjitoze e enciklopedisë “100 personalitete shqiptare të kulturës islame”, mbi jetën dhe veprën e 100 personaliteteve të shquara të besimit dhe kulturës islame në trojet shqiptare, që në harkun kohor të këtyre 100 viteve, ditën të dëshmojnë forcën e besimit dhe mbështetjes në Zotin për të ndërtuar dhe mbjellur vlera dhe dashuri në shoqërinë shqiptare.
           
Në fund, më duhet të shfaq një falënderim krejtësisht të merituar për organizatorët; Kryesinë e Komunitetit Mysliman të Shqipërisë, atë të Bashkësisë Fetare në Republikën e Maqedonisë dhe Bashkësinë Islame të Kosovës dhe drejtuesit e tyre, respektivisht: H. Selim Muça, H. Sulejman ef. Rexhepi dhe Mr. Naim Tërnava, që bënë të mundur këtë shfaqje të lartë të besimit dhe unitetit kombëtar, nëpërmjet rrugëve të dijes, besimit, harmonisë dhe bashkëpunimit për ruajtjen e gjurmëve që dritësojnë rrugëtimet e një kombi, një atdheu, një bashkësie besimi!

Imam Muhamed Sytari
Myfti i Zonës Shkodër