Ditën e hënë, më 17 shtator 2012, Myftiu i Shkodrës Imam Muhamed Sytari ka zhvilluar një takim pune me imamë të qytetit dhe zonës Shkodër. Në këtë takim është diskutuar për një sërë çështjesh që lidhen me disiplinën e jetës fetare dhe përmirësimin e imazhit të xhamisë dhe mesazheve që ajo përcjell për njerëzit.
           
Është folur edhe për filmin që prek personalitetin e hz. Muhammedit (a.s) dhe mesazhet e fesë islame, duke abuzuar, fyer e denigruar. Në këtë pikë, të gjithë imamët kanë qenë të mendimit se përbaltja dhe abuzimi me personalitetin e profetit është një vepër e patolerueshme dhe e pështirë. Imamët kanë shprehur mendimet e tyre sensibilizuese me të gjitha përpjekjet që po bëhen sot për të dëshmuar lidhjen e muslimanëve me profetin dhe fenë e tyre, nëpërmjet aktiviteteve të ndryshme teologjike e kulturore.
           
Myftiu ka shpjeguar se në kuadrin e këtyre aktiviteteve, Myftinia Shkodër ka planifikuar të zhvillojë disa organizime, nëpërmjet të cilave të ofrojë para duarve të besimtarëve dhe jo vetëm, modelin e hz. Muhammedit (a.s), si shëmbëlltyrë e vyer për mbarë njerëzimin.
           
Është lajmëruar shfaqja e filmit “Mesazhi Islam” i dubluar në shqip, ditën e enjte, më 20 shtator 2012, ora 17.30 në kinema “Millennium”, Shkodër, si dhe transmetimi i këtij filmi në një prej kanaleve lokale të Shkodrës në një prej ditëve të afërta.           

Njëkohësisht, Myftiu ka udhëzuar se të xhumanë e datës 21 shtator 2012, në të gjitha xhamitë e Shkodrës të mbahen hytbe që kanë në qendër të tyre moralin dhe shembullin e lartë të hz. Muhammedit (a.s) në shoqëri.