Pasditën e së enjtes, më 13 shtator 2012 është zhvilluar mbledhja e radhës e Këshillit të Myftinisë Shkodër. Në rend të ditës ka qenë analiza e muajit Ramazan, zhvillimi i vakëfit, jeta fetare dhe kulturore në muajt vijues, përgatitja për 10 vjetorin e gazetës “Udha Islame”, shfrytëzimi i ditëve festive dhe datave jubilare për prezantimin sa më dinjitoz të mesazheve islame në Shkodër etj.
           
Fillimisht, Myftiu Imam Muhamed Sytari ka lexuar raportin përfundimtar të aktivitetit të muajit Ramazan. Gjatë tij janë spikatur aktivitetet, risitë, ceremonitë e ndryshme, tribunat fetare, iftaret, takimet me imamët, ceremonia e Fitër Bajramit etj.  

Është diskutuar edhe realiteti i disa xhamive gjatë Ramazanit, ku është folur edhe për nevojën e marrjes së masave për eliminimin e disa pasaktësive dhe devijimeve nga kalendari i agjërimit, si dhe disiplinimi i këndimit të ezanit në xhamitë e Shkodrës.
           
Pjesë e diskutimeve ka qenë edhe çështja e vakëfit dhe shfrytëzimi i tij në shërbim të interesave islame të Myftinisë Shkodër. Është theksuar se duhet rritur angazhimi për rikuperimin e gabimeve të bëra në kohë, si dhe ndryshimi i ecurisë së Myftinisë në këtë drejtim.
           
Këshilli i Myftinisë Shkodër ka diskutuar edhe mbi përgatitjet për 10 vjetorin e gazetës “Udha Islame”, si një ngjarje e rëndësishme për muslimanët e Shkodrës dhe përtej tyre.  

Myftiu ka theksuar se botimet janë një tregues i rëndësishëm për një institucion si Myftinia. Ai ka thënë se ka ardhur koha që Myftinia Shkodër të ndahet nga disa tabu të së shkuarës dhe se mentaliteti i qëndrimit në ujëra që nuk lëvizin është prapambetje.
           
Këshilli ka diskutuar edhe për disa tematika që kanë të bëjnë për organizimin e brendshëm dhe mirëfunksionimin e jetës së xhamisë në Shkodër, ku janë dhënë mendime të vyera në këtë drejtim.           

Në fund, Myftiu ka prezantuar para këshilltarëve edhe përgjegjësin e sektorit të Rinisë Islame në Myftininë Shkodër, teologun Ervil Kuçi, të cilit i ka uruar mbarësi dhe suksese në punën e tij.