Paraditën e së shtunës, më 1 shtator 2012, Myftinia Shkodër ka zhvilluar aktivitetin kulturor: “Gjurmëve të një muaji plot jetë”. Në qendër të këtij aktiviteti ka qenë atmosfera e begatë e muajit Ramazan që kaloi, përshpirtësia e tij, tubimet vëllazërore dhe kujtimet më të mira të një muaji plot mirësi për mbarë botën.
           
Aktiviteti nisi me fjalën hapëse të mbajtur nga teologu Ervil Kuçi, nëpërmjet të cilës shpjegoi qëllimin e këtij tubimi dhe dëshirën e mirë për të kujtuar së bashku emocionet e një muaji plot jetë besimi.
           
Më pas referuan, Myftiu i Shkodrës, Imam Muhamed Sytari, Drejtori i Kulturës në KMSh, Mr. Genti Kruja dhe imami i xhamisë “Ebu Bekër”, teologu Idmir Plaku.
           
Në fjalët e tyre spikati përshkrimi i atmosferës së Ramazanit në Shkodër, Tiranë dhe mbarë Shqipërinë, duke theksuar faktin e rritjes së dukshme të numrit të agjëruesve gjatë këtij viti. U theksua se gjatë këtij Ramazani spikatën aktivitete risi, si: emisionet e shumta televizive, tendat e ndryshme, ku u shpërndanë materiale të bollshme informative rreth Ramazanit, kohëve të faljes etj, teravia në sheshin “Dëshmorët e Kombit” në Natën e Kadrit, falja e Fitër Bajramit në sheshet kryesore të mbarë Shqipërisë etj.
           
Referatet u shoqëruan edhe nga materialet e larmishme në videoprojektor, ku u përcollën aktivitetet dhe gjallëria e një muaji që bashkoi muslimanët e Shqipërisë dhe të mbarë botës rreth fesë së tyre.
           
Imamë dhe intelektualë, përcollën gjithashtu emocionet dhe kujtimet e tyre në lidhje me këtë muaj të begatë, i cili përfundoi në 19 gusht 2012.           

Në fund, për të pranishmit ishte përgatitur edhe një ftesë për kafe e çaj.