Paraditën e së mërkures, më 29 gusht 2012, Myftiu i Shkodrës Imam Muhamed Sytari ka zhvilluar një takim me mësuesit e dy medreseve të Shkodrës në prag të nisjes së vitit të ri shkollor 2012-2013.  

Fillimisht në degën e djemve e më pas në degën e vajzave, Myftiu ka uruar një vit të mbarë të mbushur me rezultate pozitive dhe suksese për nxënësit, mësuesit dhe vetë medresenë “Haxhi Sheh Shamia”.
           
Në fjalët e mbajtura para mësuesve, Myftiu ka porositur që nxënësve t’u krijohet klima e besimit dhe e dijes, e edukatës qytetare shkodrane dhe e kulturës së gjerë. Ai ka theksuar se në realitetet e sotme, nuk ka edukim më të mirë dhe më garant për një të ardhme më të mirë për rininë tonë sesa edukimi me frymën e besimit, frikën e Zotit dhe dijen e pastër.
           
Myftiu u ka përcjellur mësuesve të dy medreseve edhe selamet dhe lutjet e Hoxhës së nderuar shkodran Shejkh Vehbi S. Gavoçi, i cili, siç ka pohuar Myftiu “emocionohet dhe gëzohet pa masë kur mëson për arritjet e dy medreseve tona”.           

Njëkohësisht ka shprehur mirënjohjen e tij për kontributin dhe mbështetjen financiare të Shoqatës “Istanbul”, sikurse ka vlerësuar personalitetin e dijetarit Osman Nuri Topbash, si një model inspirues drejt bardhësive dhe moralit të besimit dhe dijes në jetë.