Në atmosferën e Fitër Bajramit, ditën e mërkure, më 22 gusht 2012, Myftinia Shkodër ka shpërndarë disa ndihma ushqimore për familje të ngujuara dhe me jetimë në zonën Shirq-Mushan të komunës Dajç.
           
Në fjalën e tij para të pranishmëve në xhaminë e fshatit, Myftiu i Shkodrës Imam Muhamed Sytari, pasi ka uruar Fitër Bajramin ka theksuar se këto ditë shërbejnë më së shumti për të nxitur solidarizimin me njerëzit në nevojë. Ai ka përsëritur se Islami është feja e vëllazërisë së muslimanëve dhe përkrahjes në raste nevoje.

Myftiu ka falënderuar edhe imamin e xhamisë, H. Kujtim Cufaj, i cili është interesuar maksimalisht për të plotësuar nevojat e besimtarëve me ndihma të ndryshme, në raste festash fetare dhe jo vetëm.

Pas shpërndarjes së pakove ushqimore në ambientet e xhamisë Shirq-Mushan, Myftiu së bashku me stafin e tij kanë vizituar edhe një nga familjet e ngujuara të zonës. Në një bashkëbisedim me plakun e moshuar 92 vjeçar të shtëpisë së vizituar, Myftiu ka theksuar se jeta është e mbushur me sprova dhe se besimi është një garanci për t’i kaluar ato me durim dhe mbështetje në Zotin.

Myftiu ka konfirmuar edhe një herë se Myftinia Shkodër do të jetë përherë e gatshme për të ndihmuar njerëzit në nevojë, të ngujuarit dhe të ketë një rol elitar në parandalimin e shkaqeve që çojnë në hasmëri në mes të individëve të shoqërisë, aq më tepër kur janë të besimeve të ndryshme.

Myftiu ka theksuar se ngujimet dhe vrasjet kanunore janë një gangrenë e pranishme gjithandej në shoqërinë shqiptare, dëshmi injorance dhe frymërash mesjetare që kërcënojnë të sotmen dhe të ardhmen e shoqërisë shqiptare.