Në ditën e dytë të Fitër Bajramit, më 20 gusht 2012, Myftiu i Shkodrës Imam Muhamed Sytari ka zhvilluar një vizitë në Shtëpinë e Fëmijës Shkodër. Me këtë rast, ai ka uruar drejtorin e këtij institucioni z. Arjan Dushaj dhe stafin e tij për Fitër Bajramin.
           
Në një bashkëbisedim me drejtorin e Shtëpisë së Fëmijëve Shkodër, Myftiu ka theksuar se qëllimi i kësaj vizite është të përcjellim mesazhet e solidaritetit dhe përkrahjes për këta fëmijë që janë amanet dhe përgjegjësi para Zotit. Myftiu ka garantuar se Myftinia Shkodër do të bëjë përpjekjet e saj për të qenë e pranishme me ndihma të ndryshme, në favor të fëmijëve të pranishëm në këtë institucion.
           
Nga ana e tij, drejtori i Shtëpisë së Fëmijëve Shkodër, z. Arjan Dushaj, ka falënderuar Myftiun e Shkodrës për përpjekjet dhe angazhimin e vazhdueshëm për përkrahjen dhe ndihmën ndaj fëmijëve që jetojnë në këtë institucion. Ai ka theksuar se këto vizita janë një shenjë solidarizimi dhe një mesazh për të gjithë ata që duan të ndihmojnë dhe të përkrahin këtë institucion.           

Me rastin e kësaj vizite, Myftinia Shkodër ka shpërndarë 50 pako ushqimore në ndihmë të Shtëpisë së Fëmijëve Shkodër.