Të dielën më 19 gusht 2012, pas faljes së namazit të Fitër Bajramit, Myftinia Shkodër ka organizuar edhe pritjen tradicionale me këtë rast.
           
Të shumtë kanë qenë vizitorët që kanë mbërritur për të uruar festën dhe për të dhënë mesazhet e tyre për mbarë opinionin musliman të Shkodrës. Drejtues të institucioneve vendore, deputetë, intelektualë, drejtues të shoqatave dhe institucioneve lokale dhe besimtarë të ndryshëm kanë marrë pjesë në këtë pritje të organizuar nga Myftinia Shkodër.
           
Si përherë, drejtuesit e komuniteteve fetare të Shkodrës, kanë qenë të parët që kanë uruar Myftiun dhe besimtarët me rastin e Fitër Bajramit. Në prononcimet e tyre para mediave të pranishme, Arqipeshkvi i Shkodrës dhe Famullitari i Kishës Ortodokse, kanë dhënë mesazhe të ngrohta të harmonisë dhe respektit ndërfetar.           

Pritja e vizitorëve me rastin e festave fetare është bërë traditë, duke bërë që atmosfera e tyre të përhapet gjithandej dhe të ndahet edhe me miq e dashamirë.