Që në orët e para të mëngjesit të ri të ditës së dielë, më 19 gusht 2012, besimtarët muslimanë të Shkodrës janë drejtuar nga sheshi bri xhamisë “Ebu Bekër”, për faljen e namazit të sabahut dhe pjesëmarrjen në ceremoninë e Fitër Bajramit.
           
Pas një muaji të mbushur me agjërim, namaz teravie, lexim Kur’ani, sadeka dhe bamirësi të ndryshme, muslimanët e Shkodrës dhe të mbarë botës kremtojnë në këtë ditë të begatë festën e shënuar të Fitrit, si një shenjë shpërblimi nga Zoti i gjithësisë dhe një festë legjitime për krejt ymetin.
           
Ceremonia e kësaj dite ka nisur me faljen e namazit të sabahut në shesh, nën drejtimin e imamit të ri, z. Durim Kasemi. Më pas, nga tribuna, teologu Arben Halluni ka bërë një rezyme të muajit Ramazan dhe pasi ka uruar besimtarët për këtë ditë, ka ftuar me radhë imamët e nderuar: z. Naim Drijaj, z. Adem Pizga, H. Fejzi Zaganjori, z. Idmir Plaku dhe z. Gilman Kazazi, të cilët kanë përshëndetur të pranishmit dhe kanë folur për mesazhet e vëllazërisë, harmonisë, besimit dhe domosdoshmërisë së ruajtjes së vlerave islame në jetë.
           
Në prag të afrimit të namazit të Fitër Bajramit, teologu Arben Halluni ka shpjeguar mënyrën e faljes së këtij namazi dhe ka ftuar Myftiun e Shkodrës Imam Muhamed Sytari për ta drejtuar këtë namaz.
           
Pas namazit të Fitër Bajramit, i shoqëruar edhe nga tekbiret që kanë mbushur atmosferën e Shkodrës, Myftiu është ngjitur në minber dhe ka mbajtur hytben e rastit.
           
Në hytben e këtij bajrami, Myftiu Imam Muhamed Sytari ka bërë thirrje për t’u kthyer nga Zoti, për të forcuar vëllazërinë dhe mirëkuptimin në mesin e muslimanëve, për të jetuar me krenari si muslimanë në jetë dhe për të mos u frikësuar përballë tundimeve që e ftojnë shqiptarin për t’u zhveshur nga besimi dhe identiteti i tij fetar.
           
Myftiu ��shtë lutur për të mirën e muslimanëve të Shkodrës, ka uruar mbarësi dhe suksese për ta dhe ka uruar me zemër Fitër Bajramin.           

Në një atmosferë festive, plot tekbire dhe urime të përzemërta, muslimanët e Shkodrës janë përshëndetur në mes vete, me imamët dhe Myftiun e tyre duke uruar Fitër Bajramin si një ditë te vlerave dhe madhështisë së shpirtit islam.