Shkodër, më 18 gusht 2012/ 30 Ramazan 1433
 

Të dashur vëllezër e motra muslimanë,
Të nderuar bashkëqytetarët e mi,
 

Rreth një muaj më parë, të gjithë ne bëheshim gati për të pritur më të mirin e muajve të vitit; Ramazanin. Sot, bashkarisht po bëhemi gati të përshendetemi me të, duke iu lutur All-llahut të na e ketë pranuar këtë muaj si një dëshmi besimi, përulje dhe respekti ndaj Vullnetit të Tij!
           
Nesër, të dielën, më 19 gusht 2012, mbarë bota islame feston Fitër Bajramin, ditën e shpërblimit, të përkushtimit, të vëllazërisë, të solidaritetit, të afrimit me njëri-tjetrin, të altruizmit.
           
Në çdo cep të vendit tonë e në botë, ka akoma njerëz të vetmuar, të varfër, të pastrehuar, të uritur, të etur, të sëmurë e në lëngata nga më të ndryshmet. Dita e Fitër Bajramit, na bën që të mendojmë më shumë për ta, të lutemi, të punojmë dhe të shpresojmë në All-llahun (xh.sh) se do t’i shërojë dhembjet në këtë vend, në çdo cep të ymetit islam, kudo në botë, duke shëruar injorancën, djallëzitë, mashtrimin, veset, çdo të keqe që kërcënon sot njeriun, jetën e tij, botën mbarë!
           
Në këtë ditë të begatë, kam dëshirë të lutem me zemër për mirëqenien tuaj, për një të ardhme më të mirë të fëmijëve tanë, për një rini më të pjekur e besimtare, më afër vlerave të larta të mësimeve hyjnore, më larg rrugëve të femohimit, injorancës dhe humbjes së kohës.
           
Në akshamin e kësaj dite do ta përcjellim muajin Ramazan me shumë mall e nostalgji, me lutjet më të mira që të bëhet ndërmjetës për ne në ditën e gjykimit para duarve të Zotit Mëshirëplotë.
           
Mos e harroni besën e muajit Ramazan, përkushtimin në ditët e tij, respektimin e namazit, ndihmën ndaj nevojtarëve, sofrat e harmonisë e të vëllazërisë në mes vete, përuljen ndaj Zotit dhe udhëzimit të Tij.
           
Mos i ktheni shpinën All-llahut, hapjani zemrën Atij, dëshmohuni të denjë për dashurinë dhe mëshirën e Tij të pakufijshme, pendohuni dhe gëzoni sihariqet e bekimeve të Tij në çdo moment të një jete të re me më shumë besim e përkushtim!           

Ramazan të pranuar dhe me hajr Fitër Bajramin!