Paraditën e së enjtes, më 16 gusht 2012, Myftiu i Shkodrës Imam Muhamed Sytari ka thirrur imamët e qytetit në një takim konsultativ në lidhje me akvititetin e Fitër Bajramit, faljen e tij, ceremoninë e pritjes së vizitorëve etj.
           
Pas diskutimeve të frytshme dhe vëllazërore, Myftinia Shkodër ka vendosur që edhe këtë vit, namazi i Fitër Bajramit të falet në sheshin bri xhamisë “Ebu Bekër”, duke iu referuar traditës së profetit Muhammed (a.s) në këtë ditë feste.
           
Njëkohësisht u vendos edhe programi i kësaj dite festive, duke nisur nga dalja në shesh që në orën 5.15 të mëngjesit të ditës së dielë, më 19 gusht 2012, që përkon me ditën e parë të Fitër Bajramit. Më pas, rreth orës 5.30 do të bëhet falja e namazit të sabahut. Me përfundimin e tij, teologë dhe imamë të qytetit të Shkodrës do të zënë vend në tribunë për të përshëndetur dhe mbajtur disa këshilla dhe udhëzime që kanë të bëjnë me atmosferën e kësaj dite.
           
Në orën 6.40, besimtarët do të bëhen gati për faljen e namazit të Fitër Bajramit, që pasohet nga hytbeja e tij, që do të mbahet nga Myftiu i Shkodrës Imam Muhamed Sytari.
           
Myftinia Shkodër ju fton që të merrni me vete edhe sexhaden e namazit, duke pasur parasysh territorin e madh dhe pjesëmarrjen e dendur të njerëzve në këtë ditë festive dhe në këtë adhurim të begatë në shoqëri të vëllazërisë islame.
           
Njëkohësisht, u vendos që ceremonia e pritjes së vizitorëve me rastin e Fitër Bajramit të këtij viti, të zhvillohet në xhaminë e Parrucës në një hapësirë kohore dy orëshe: 09.00 deri 11.00.

MYFTINIA SHKODËR JU URON ME ZEMËR:
ADHURIM TË PRANUAR,
RAMAZAN NDËRMJETËSUES NË DITËN E GJYKIMIT
DHE MBARËSI TË PËRHERSHME NË JETË!
GËZUAR FITËR BAJRAMIN!