Ditën e martë, më 14 gusht 2012, në ambientet e Grand Hotel Europa është shtruar iftari tradicional i kësaj nate të begatë. Të ftuar në këtë sofër bujare të besimit dhe të harmonisë kanë qenë edhe drejtuesit më të lartë të komuniteteve fetare në Shkodër, drejtuesit lokalë e vendorë të qytetit, deputetë, kryetarë të komunave, biznesmenë, intelektualë e drejtues të shoqatave të ndryshme bamirëse.
           
Në fjalën e tij përshendetëse, Myftiu i Shkodrës Imam Muhamed Sytari ka vlerësuar këtë sofër si një mundësi afrimi dhe komunikimi të qytetëruar me baza të shëndetshme besimi. Ai ka uruar të gjithë agjëruesit dhe është lutur që harmonia dhe dashuria e besimit të mbizotërojë në jetën e secilit.  
Myftiu nuk ka lënë pa përmendur edhe shembullin elitar të Shkodrës në harmoninë dhe bashkëpunimin në mes të komuniteteve fetare, si një dëshmi e vlerave besimore në këtë qytet.
           
Gjatë përshëndetjes, Myftiu ka falënderuar edhe pronarin e GHE, z. Agron Çela, të cilit i ka uruar mbarësi dhe suksese në punën e tij dhe bamirësitë e ndryshme në shërbim të komunitetit.  

Me këtë rast, në kujtim të këtij iftari, Myftiu i ka dhuruar z. Çela, kolanën e plotë të biografive mbi jetën e profetit Muhammed (a.s), botim i LOGOS-A, duke theksuar se në këto libra është shembulli më i mirë i besimit, i suksesit dhe i modelit në jetë.