Ditën e shtunë, më 11 gusht 2012, në ambientet e “Rozafa Sea Food”, pranë xhamisë së Parrucës, është shtruar një iftar vëllazëror, sponsorizuar nga biznesmeni i njohur Gjergj Luca dhe pronari i lokalit Shkëlqim Naipi.
           
Iftari në fjalë është i pari i këtij lloji, ku dëshmohen edhe një herë vlera të harmonisë fetare, respektit të besimit të tjetrit dhe nderimit ndaj muajit të Ramazanit edhe nga jomuslimanët në Shkodër dhe Shqipëri.
           
Në të vërtetë, ky iftar duhet të bëhet shembull edhe përtej Shkodrës, por mbi të gjitha ai është një dëshmi e vlerave të besimit dhe rritjes së influencës së tij në shoqëri.
           
Në këtë iftar elitar, ku ishin të ftuar edhe drejtues të dy medreseve të Shkodrës, teologë e imamë, intelektualë e përfaqësues të Këshillit Bashkiak të Shkodrës, ishte i pranishëm edhe anëtari i Kryesisë së Komunitetit Mysliman të Shqipërisë, z. Genti Kruja i shoqëruar nga Myftiu i Shkodrës Imam Muhamed Sytari.
           
Në fjalën e tij përshëndetëse, Myftiu ka përshëndetur dhe uruar z. Gjergj Luca dhe z. Shkëlqim Naipi për këtë sofër të begatë, në të cilën mbi të gjitha ka spikatur vlerësimi i tjetrit, nderimi i besimit dhe vlerat e qytetarisë shkodrane të ushqyera nga besimi në Një Zot të Vetëm.  

Myftiu është lutur që Zoti t’i begatojë të gjithë njerëzit vullnetmirë, biznesmenët e këtij lloji dhe të shtohet dashuria, harmonia dhe mirëkuptimi në mesin e besimtarëve dhe atyre që i duan të mirën Shqipërisë dhe shoqërisë shqiptare.