Gjatë qëndrimit në Prizren, natën e së enjtes, më 9 gusht 2012, Myftiu i Shkodrës Imam Muhamed Sytari ka marrë pjesë në emisionin fetar të muajit Ramazan, të drejtuar nga teologu Ajni Sinani në “Tv Besa”, Prizren.
           
Bashkëbisedimi i ngrohtë ka përcjellur tek teleshikuesit emocione dhe ndjesi të shumta pozitive, sidomos kur është folur për mirësitë e këtij muaji dhe vlerën e lirisë së komunikimit të shqiptarëve në trevat e  tyre. Myftiu ka shfaqur gëzimin e tij për faktin e takimit në këtë tryezë të besimit dhe vlerave islame, me teologun e mirënjohur Ajni Sinani, për të cilin ka thënë se: “është një emër i nderuar i dijes, përkushtimit dhe shembullit intelektual musliman, për shërbimet e sinqerta dhe kontributin që ka dhënë gjatë momenteve më të vështira të ripërtëritjes së fesë islame në Shkodër, pas rënies së sistemit ateist”. 

Myftiu ka folur edhe për persekutimin e hoxhallarëve të shquar të Shkodrës. Ka rrëfyer momente të shumta nga dhunimi i hoxhallarëve, djegia e bibliotekave të tyre, sekuestrimi i objekteve të kultit, prishja e xhamive dhe tendenca injorante ateiste për ndryshimin e traditave islame në Shkodër dhe mbarë Shqipërinë.
           
Njëkohësisht, teologu Ajni Sinani ka përmendur me respekt periudhën e kaluar në Shkodër si një mësues në medrese dhe kontributin intelektual islam, duke u afirmuar nëpërmjet emisioneve televizive, shkrimeve dhe përkthimeve të ndryshme, tribunave fetare dhe komunikimeve të qytetëruara me besimtarët në Shkodër.
           
Në bashkëbisedimin që ka zgjatur rreth 60 minuta, është folur edhe për atmosferën e Ramazanit në Shkodër, realitetet 22 vjeçare të Myftinisë Shkodër dhe Thirrjes Islame në qytetin e Shkodrës, sfidat përballë muslimanëve në Shkodër etj.           

Në fund, Myftiu Imam Muhamed Sytari i është drejtuar rinisë kosovare me disa këshilla dhe udhëzime në lidhje me afrimin dhe shtimin e dashurisë ndaj Zotit dhe mësimeve të Tij.