Ditën e enjte, më 9 gusht 2012, Bashkësia Islame e Prizrenit ka shtruar një iftar vëllazëror, ku i ftuar nderi ka qenë Myftiu i Shkodrës Imam Muhamed Sytari me bashkëpunëtorë.
           
Ky iftar vjen në kuadër të protokollit të binjakëzimit në mes të dy myftinive dhe si një hap i ri në rritjen e bashkëpunimit në mes të institucioneve fetare islame të trevave shqiptare.
           
Në emër të Bashkësisë Islame të Prizrenit, Kryetari i saj, Lutfi ef. Ballek ka falënderuar Myftiun e Shkodrës me bashkëpunëtorë, për pjesëmarrjen në këtë iftar të shtruar në emër të vëllazërisë dhe vlerave të larta të besimit dhe bashkëpunimit në mes të institucioneve fetare islame. Ai ka theksuar se këto tryeza do ta shtojnë edhe më shumë bashkëpunimin dhe afrimin në mes të Bashkësisë Islame Prizren me Myftininë Shkodër.
           
Këtë sofër e ka përshëndetur edhe Imam Muhamed Sytari, i cili ka falënderuar nikoqirët për ftesën, si dhe ka vënë në dukje rëndësinë e madhe që ka afrimi i mëtejshëm i drejtuesve dhe prijësve fetarë muslimanë në trevat shqiptare. Myftiu ka theksuar, se vëllazëria që na bashkon është shumëdimensionale, “është vëllazërie besimi, gjaku, gjuhe, kombi e traditash, prandaj është koha që ta falënderojmë me të madhe Zotin e gjithësisë për mirësinë e lirisë dhe mundësinë e komunikimit lirshëm në shërbim të vlerave të larta islame dhe kombëtare”.
           
Më pas, Myftiu i ka dhuruar Kryetarit të B.I. Prizren, një suvenir, ku janë bashkuar elementë të dijes me simbolet kombëtare, si kujtim i kësaj sofre vëllazërore.           

Iftari ka dëshmuar një frymë vëllazërie dhe komunikimi të sinqertë në mes të imamëve të shumtë, drejtuesve lokalë, deputetëve dhe drejtuesve fetarë të pranishëm në këtë sofër të begatë.