Ditën e mërkure, më 8 gusht 2012, Myftiu i Shkodrës ka zhvilluar një takim me një grup prej imamëve të qytetit dhe të fshatit, në prag të 10 ditëve të fundit të muajit Ramazan.
           
Në këtë takim, është diskutuar për mbarëvajtjen e jetës fetare gjatë 20 ditëve të shkuara të Ramazanit dhe shtimin e angazhimit dhe aktiviteteve në pjesën e mbetur nga ky muaj i begatë.
           
Me këtë rast, Myftiu ka dhënë disa udhëzime për imamët dhe ka kërkuar që të respektohet disiplina e brendshme e xhamisë, duke dhënë një shembull pozitiv edhe për vizitorët dhe të gjithë ata që vijnë për të mësuar në xhami.
           
Janë shpërndarë edhe udhëzimet e Kryesisë së Komunitetit Mysliman të Shqipërisë, ku vlen të përmendet përcaktimi i kuotës së sadekatul-fitrit për vitin 2012, që është 300 (treqind) lekë të reja për person etj. Kjo shumë të hollash duhet nxjerrë deri natën e Bajramit dhe u jepet të afërmve nevojtarë, jetimëve, borxhlinjve etj.
           
Është konfirmuar edhe një herë falja e namazit të Fitër Bajramit në sheshin bri xhamisë “Ebu Bekër”, si një festë masive e muslimanëve të Shkodrës.           

Ndërkohë, disa prej imamëve, kanë shprehur mendimet e tyre në lidhje me tematikën e këtij takimi dhe janë lutur për mbarësinë dhe shtimin e mëtejshëm të harmonisë dhe vëllazërimit në mes të muslimanëve.