Ditën e hënë, më 6 gusht 2012, Kryetari i Komunës Bërdicë, z. Besnik Brahimi ka shtruar një iftar me rastin e muajit të begatë të Ramazanit.
           
Sofra e këtij iftari ka bashkuar besimtarë të shumtë të Komunës Bërdicë, drejtues të administratës dhe përfaqësues të komuniteteve të tjera fetare, duke dëshmuar vlerat e larta besimore dhe ato të harmonisë që përhap kudo në shoqëri Islami nëpërmjet mësimeve të tij hyjnore.
           
Në fjalën e tij para të pranishëmve Kryetari i Komunës Bërdicë z. Besnik Brahimi, ka falënderuar të pranishmit për pjesëmarrjen dhe ka uruar që ky muaj i bekuar të jetë sa më i lehtë dhe i mbarë për krejt agjëruesit.
           
I ftuar nderi në këtë iftar ka qenë edhe Myftiu i Shkodrës Imam Muhamed Sytari. Në fjalën e tij, pasi ka uruar agjëruesit e shumtë për adhurimin dhe sakrificën e tyre, ka falënderuar shembullin e kryekomunarit Besnik Brahimi, “i cili respekton besimin dhe besimtarët dhe dëshmon vlera në marrëdhënien e tij me ata që e mbështetën për të drejtuar këtë komunitet”.

Myftiu ka nxitur që edhe drejtuesit e tjerë lokalë e vendorë të mos kenë ndrojtje për të organizuar iftare, në të cilët të ftohen besimtarët, që janë pjesa më fisnike e shoqërisë që i ka zgjedhur për të qenë aty ku janë.