Ditën e xhuma, më 3 gusht 2012, Myftinia Shkodër ka ftuar në sofrën e iftarit gazetarët e mediave lokale të Shkodrës, në shenjë respekti dhe mirënjohje për angazhimin e tyre dhe korrektësinë e mbulimit të aktiviteteve të shumta të Myftinisë Shkodër, sidomos në ditët e muajit Ramazan.
           
Në fjalën e tij përshëndetëse, Myftiu i Shkodrës Imam Muhamed Sytari ka theksuar se media ka një rol të rëndësishëm në këto ditë, kur jetohet në liri dhe secili ka të drejtën e tij në prezantimin e mendimeve dhe ideve të ndryshme.  

Myftiu ka falënderuar gazetarët dhe operatorët e televizioneve lokale të Shkodrës dhe përtej tyre, si: Tv1 Channel, Tv Rozafa, Tv Antena Nord, Tv Kopliku, Tv Lezha, Radio Jehona etj, si dhe korrespondentët e gazetave të përditshme dhe mediave vizive kombëtare të pranishëm në iftar, për punën dhe kontributin e tyre të vyer në pasqyrimin e aktiviteteve të larmishme të Myftinisë Shkodër dhe përtej saj.           

Myftiu është lutur për mbarësinë e gazetarëve, të cilët përcjellin realitetet e Shkodrës dhe jo vetëm, në një kohë, kur njerëzit janë nevojtarë për lajme korrekte dhe serioze.