Në një atmosferë të ngrohtë e vëllazërore, Myftinia Shkodër ka shtruar iftarin e ditës së hënë, më 23 korrik 2012, për një grup të rinjsh muslimanë, frekuentues të xhamive të ndryshme të Shkodrës.
           
Sofrës së iftarit, i ka paraprirë një përshëndetje nga Myftiu i Shkodrës Imam Muhamed Sytari. Në fjalën e tij, Myftiu ka përgëzuar të rinjtë për vullnetit e tyre, për besimin dhe udhëzimin në Islam. 

Myftiu ka theksuar se Ramazani është muaji i rinisë, sepse gjatë Ramazanit është shkruar historia e lavdisë dhe e krenarisë së muslimanëve kudo në botë. Ai është lutur që All-llahu ta begatojë jetën e të rinjve muslimanë dhe t’i udhëzojë përherë drejt më së mirës në jetën e tyre.
           
Më pas, teologu Naim Drijaj ka mbajtur një bisedë fetare, në të cilën ka shpjeguar vendin e rinisë në Kur’an dhe në Traditën e profetit Muhammed (a.s). Ka theksuar se të rinjtë kanë një vend të veçantë në Islam, sepse njerëzit që e pranuan më së pari Thirrjen e Hz. Muhammedit (a.s), ishin të rinjtë. Këtu, teologu i nderuar ka përmendur disa raste dhe shembuj tërheqës nga historia islame, ku del në pah fakti se një rini e udhëzuar nga e mira është një shenjë mbarësie dhe përparimi për krejt shoqëritë njerëzore.
           
Në prag të iftarit janë kënduar edhe disa ilahi, të cilat e kanë mbushur sallën me emocionet dhe përshpirtësinë e këtij muaji të begatë.           

Në fund, teologu Ervil Kuçi, përgjegjës i sektorit të rinisë në Myftininë Shkodër, ka falënderuar pjesëmarrësit në iftar dhe është lutur që tubime të tilla të ketë sa më shumë, sepse janë një vlerë më shumë për shoqërinë dhe një arsye më tepër për të dëshmuar së bashku harmoninë dhe vëllazërinë e shenjtë islame.