Pasditën e së enjtes, më 19 korrik 2012, Myftinia Shkodër ka zhvilluar ceremoninë e pritjes së Hënës së re të Muajit Ramazan 1433/2012.
           
Imamë, teologë, besimtarë dhe besimtare, janë mbledhur së bashku në oborrin e xhamisë “Ebu Bekër”, për të ndjekur përshëndetjet e këtij prag-Ramazani.
           
Në fjalën e tij të hapjes, teologu Arben Halluni ka theksuar se kjo ceremoni që zhvillohet për herë të parë, është pjesë e traditave islame, që organizohen kudo në botën islame në prag të këtij muaji. Ai ka uruar që ky muaj të jetë sa më i begatë për besimtarët dhe familjet e tyre.
           
Më pas kanë përshëndetur edhe imamët dhe teologët e nderuar Idmir Plaku, Bashkim Bajraktari dhe Lavdrim Hamja. Në përshëndetjet e tyre është theksuar vlera e agjërimit të Ramazanit, si një adhurim me të cilin njeriu afrohet përherë e më shumë me Zotin e tij. Imamët kanë përshëndetur besimtarët dhe janë lutur për një muaj të lehtë e të mbarë për të gjithë agjëruesit.
           
Më pas, të pranishmit kanë dëgjuar përshëndetjen dhe mesazhin e Myftiut të Malësisë së Madhe, H. Edmir Smajlaj. Në fjalën e tij, Myftiu i nderuar ka uruar të gjithë besimtarët me rastin e muajit të agjërimit dhe ka bërë thirrje që të shfrytëzohet koha për të shtuar adhurimet dhe lutjet drejtuar Zotit të gjithësisë.
           
Në prag të kohës së akshamit, Myftiu i Shkodrës Imam Muhamed Sytari ka dhënë mesazhin e tij drejtuar besimtarëve. Ndër të tjera ka thënë: “Ky është muaji i pendimit, i kthimit dhe i heqjes dorë nga një jetë rutine, pa dritë besimi a e përzier me elementë të një shirku të verbër e gafil, që e bën njeriun të jetojë si një krijesë e përbuzur, pa logjikë, pa orientim, pa dritë në fund të një tuneli të gjatë të një jetë plot vështirësi!

Është muaji i të gjithë atyre, që kur zgjohen në mëngjes, kanë harruar abdesin, kanë lënë pas hakun e Zotit, namazin e sabahut; le të kthehen, se dera është e hapur dhe Zoti pret me dashurinë e Tij të pakufijshme kthimin e tyre!

Është muaji i të gjithë atyre, që e nisin ditën me një gotë alkool, që nuk reshtin së konsumuari lloje të ndryshme të pijeve të ndaluara e të bëra haram; le të ndalen qoftë edhe për një muaj të vetëm, për hatrin e Atij që krijoi çdo të mirë për njeriun, krijesën e Tij më të përsosur! 

Është muaji i të gjithë atyre, që kanë harruar të thonë: “O Zot, më fal! O Zot, unë kam harruar se Ti je! O Zot, a më pranon edhe mua?”, për të gjetur dyert e mëshirës, faljes dhe pranimit të pendimit të hapura e në pritje!

Është muaji i të rinjve, që të lënë qoftë edhe për një muaj të vetëm, sidomos në këtë verë provokuese, mbrëmjet e përziera, zhurmën e muzikës të shoqëruar me efektet e dritave verbuese dhe pijeve dehëse, që dhurojnë një relaksim falls, pas së cilit nuk ka dobi, vlerë a botë besimi!

Është muaji i besimtarëve që kanë harruar se Zoti i gjithësisë u ka dërguar një Libër, i cili përmbledh çdo libër të shenjtë dhe çdo mësim të urtë për jetën dhe të përtejmen e njeriut; Kur’anin. Të kthehen nga ai, të gjejnë veten, jetën, shpresën, dritën e vërtetë, shembujt e popujve besimtarë dhe rrugët e zhveshjes nga robëria e të qenit skllav i shejtanit, i epsheve, i veseve, i devijimit dhe shpikjes në besim e fé!”

Më pas, të pranishmit kanë dëgjuar me shumë emocion këndimin e ezanit live nga z. Ervin Metani. Pas faljes së namazit të akshamit të parë të këtij Ramazani të bekuar, të pranishmit kanë uruar njëri-tjetrin dhe janë lutur për një muaj plot begati.

Ceremonia e pritjes së Hënës së re të Ramazanit 1433/2012, është transmetuar live nga Tv1 Channel.