Pasdrekën e së hënës, më 16 korrik 2012, Myftiu i Shkodrës Imam Muhamed Sytari ka pritur në një takim të përzemërt Konsullin e Kuvajtit në Tiranë, z. Fajsal Al-Bakr.

Vizita e z. Al-Bakr, përkon edhe me fillimin e muajit të begatë të Ramazanit. Me këtë rast, ai i ka përcjellur Myftiut të Shkodrës, selamet dhe përshendetjet më të përzemërta të ambasadorit të Kuvajtit në Shqipëri, z. Najjeb Al-Badr.
           
Konsulli kuvajtian e ka njoftuar Myftiun e Shkodrës, se në kuadër të mesazheve bujare të muajit Ramazan, ambasada e Kuvajtit do të kontribuojë me disa pako ushqimore për familjet e varfëra, jetimët dhe nevojtarët e Myftinisë Shkodër.
           
Myftiu e ka falënderuar këtë gjest bamirës të ambasadës kuvajtiane dhe ka theksuar se këto kontribute shërbejnë për të forcuar edhe më shumë urat lidhëse ndërmjet dy popujve tonë, si dhe si një dëshmi e bamirësisë dhe bujarisë së muslimanëve kudo në botë. Ai ka theksuar se sot, shoqëritë duhet të edukohen me vërtetësitë e mesazheve të Islamit, në thelb të cilëve qëndron bujaria, ndihma ndaj nevojtarëve, bamirësia dhe vlerësimi i njeriut si krijesë e Zotit.
           
Në shoqëri të Myftiut, konsulli Al-Bakr, ka marrë pjesë në shpërndarjen e disa prej ndihmave ushqimore për jetimoren e qytetit dhe disa familje shkodrane në nevojë.           

Konsulli ka shprehur kënaqësinë e tij për këtë vizitë në Shkodër dhe ka garantuar se ambasada e Kuvajtit do të vazhdojë të jetë e pranishme edhe më tej, në marrëdhëniet e saj të shkëlqyera me Myftininë Shkodër.