Mbrëmjen e së enjtes, më 5 korrik 2012, pas namazit të akshamit në xhaminë e Parrucës, Myftinia Shkodër ka nisur serinë e “Derseve të hapura”, që i paraprijnë ardhjes së muajit të begatë të Ramazanit.

Pas faljes së namazit të akshamit me xhematë, teologu Arben Halluni ka bërë prezantimin e këtij aktiviteti që zhvillohet për herë të parë në Shkodër. Ai ka shpjeguar se Myftinia Shkodër, organizon këtë seri ligjëratash fetare nga imamët e nderuar të saj, me qëllim që xhemati dhe të interesuarit të kenë mundësi të mësojnë njohuri dhe dituri të reja në lidhje me botën e agjërimit të ramazanit, që tashmë është nisur drejt nesh.

Ndërkohë, në fjalën e tij, Myftiu i Shkodrës Imam Muhamed Sytari, ka falënderuar kontributin e imamëve të Shkodrës në rrugën e dritësimit të rrugës për besimtarët, sidomos në këto ditë adhurimesh dhe lutjesh, që i paraprijnë muajit të Ramazanit. Myftiu ka kërkuar që besimtarët të luten për mirëqenien e Shkodrës, Shqipërisë.

Më pas, besimtarët e pranishëm kanë pasur mundësi të ndjekin temën e parë të “Derseve të hapura”, të mbajtur nga imami i xhamisë “Ebu Bekër”, teologu Gilman Kazazi. Në temën e tij: “Nijeti dhe rëndësia e tij në agjërim”, ka shtjelluar me detaje domethënien e nijetit, vendin e tij, kohën e tij dhe rëndësinë që ka ai në dallimin e punëve nga adete në ibadete. Në ligjëratën e tij, imami i nderuar i është përgjigjur edhe pyetjeve të ndryshme që lindin në lidhje me nijetin, bërjen e tij me gojë a me zemër, si dhe rëndësinë që ka ai në përcaktimin e veprave të njeriut në jetë.

Ligjërata ka qenë e mbushur me argumente dhe shembuj nga jeta e përditshme dhe historia islame. Ndërkohë, seria e “Derseve të hapura”, vazhdon edhe për pesë ditë të tjera sipas këtij programi:

Ditën e xhuma, më 6 korrik 2012, ligjëron teologu Idmir Plaku: “Agjërimi material dhe i gjymtyrëve”.

Ditën e shtune, më 7 korrik 2012, ligjëron teologu Adem Pizga: “Rregullat juridike të agjëruesit nga syfyri në iftar”.

Ditën e enjte, më 12 korrik 2012, ligjëron teologu Durim Kasemi: “Sjellja dhe morali i agjëruesit në ditët e Ramazanit”.

Ditën e xhuma, më 13 korrik 2012, ligjëron teologu Ylli Buraniqi: “Vlera e sadekasë dhe kultura e saj në Ramazan”.

Ditën e shtunë, më 14 korrik 2012, ligjëron teologu Bashkim Bajraktari: “Ramazani, muaj i ringjalljes së vlerave islame”.