Imam Muhamed Sytari
Myfti i Zonёs Shkodёr 

Ramazani, muaji i pёrkushtimit dhe adhurimeve tё sinqerta, ishte bёrё gati tё udhёtonte drejt hapёsirave ndёrmjetёsuese me Zotin e gjithёsisё, kur ca pikla shiu morёn tё gjallёronin tokёn nё kёtё prag-feste... U bёnё shoqёrueset e tij drejt stacioneve tё bardhёsisё, nё sixhilet e kohёs, nё gjirin e sё cilёs ruhet çdo gjё qё mё pas do tё kthehet nё dёshmitar... Dёshmitar i kohёs, i jetёs, i sё ardhmes sё pёrjetshme...
           
Nga dritarja e dhomёs sё librave, zhurma relaksuese e shiut tё imёt qё bie nga lart, mё merr me vete nё krahёt e historisё drejt njё vendi e njё kohe, ndryshe nga ky vend e kjo kohё... Aty ёshtё babai i dytё i njerёzimit, Hz. Nuhi... Asokohe, ai i ftonte njerёzit e hutuar drejt besimit dhe udhёzimit hyjnor. Libri, dёshmon pёr tё: “Ai tha: O populli im, unë jam i dërguar te ju, jam i qartë. Adhurojeni All-llahun, kini frikë prej Tij dhe mua më dëgjoni!”[1]. Por, ata nuk e dёgjuan dhe nuk iu bindёn... Sa mjerё pёr ta! E hidhёruan tё dёrguarin e Tё Vetmit Fuqiplotё, saqё i dёshpёruar iu drejtua Zotit tё tij: “O Zoti im, unë e thirra popullin tim natën e ditën. Por thirrja ime vetëm ua shtoi ikjen... Unë u thashë: “Kërkoni falje Zotit tuaj, se Ai vërtet falë shumë; Ai ju lëshon nga qielli shi me bollëk...”[2]! U bёnte thirrje pёr t’u kthyer nga besimi dhe drita e teuhidit, u tregonte rrugёt e istigfarit si fenerё ndriçues pёr udhёtarёt, por ata... nuk kuptonin se frutet e istigfarit tё sinqertё janё tё shumta e tё pakufijshme. Ato janё argumente tё natyrshme tё pranimit dhe pёlqimit hyjnor. Nё mes tyre ёshtё edhe “shiu i bollshёm”, tamam si ai qё ra natёn e Fitёr Bajramit, teksa njerёzit bёheshin gati pёr t’u zgjuar pёr namazin e sabahut dhe ceremoninё e Bajramit...
           
Shiu qё ra, sikur e vulosi me “pёlqim e pranim” adhurimin e njё muaji tё tёrё, qё tashmё u kthye nё “kohё tё shkuar”. Ramazani shkoi dhe hёna e re e muajit Shevval solli me vete edhe reshjet e para tё begatisё e gjallёrisё...
           
Ora 5 e 50 minuta. Ikameti fton besimtarёt tё bёhen gati pёr namazin e sabahut, tё cilin e falim sё bashku nёn drejtimin e imamit tё xhamisё. Momenti i ikametit i pёrngjet lajmёrimit pёr t’u pёrgatitur pёr njё garё, ku tё gjithё rreshtohen me vёshtrimet e tyre drejt njё finishi, para tё cilit tё gjithё mbёrrijnё fitimtarё... Nё fund, atyre nuk u matet koha dhe shpejtёsia, por cilёsia dhe sinqeriteti i drejtimit...
           
Ora 6 e mёngjesit. Nga foltorja e xhamisё, njerёzit mё shfaqen tё ndryshёm. Ka prej tyre qё vёshtrojnё drejt meje dhe presin fillimin e dersit tё Fitёr Bajramit. Disa tё tjerё, akoma luten nё pёrshpirtёsinё e kёsaj dite. Diku mё tej, ata qё kanё ardhur me vonesё, marrin tё falen me tё shpejtё pёr tё zёnё kohёn e sabahut qё tashmё afrohet minutё pas minute me kohёn e namazit tё Bajramit. Duket se edhe vetё minutat, mezi presin tё kalojnё njёra-tjetrёn pёr t’i lёnё vendin momenteve tё Fitrit...
           
Nga pozita e vaizit u uroj pёrzemёrsisht kёtё ditё feste. Dhe ndalem pak. Arsyetoj. Dje, nё kёtё kohё e kishim haram ushqimin, pijen. Sot, nё tё njёjtёn kohё, e kemi haram agjёrimin! Subhanall-llah! Dhe, duke respektuar vullnetin hyjnor tё kёtij arsyetimi, me gotёn e ujit nё dorё, duke dёshmuar fitrin, u them me gojёn plot: “Gёzuar Fitёr Bajramin”!
           
Minutat kalojnё dhe xhamia sa vjen e mbushet, saqё nё njё moment, ca tё rinj qё kanё ardhur pak mё vonё se tё tjerёt, janё tё detyruar tё qёndrojnё jashtё, te pragu i derёs... Shkodra sot ka festё, ka Bajram. Shkodranёt vrapojnё drejt xhamive pёr t’u falur, pёr t’u lutur, pёr tё dёgjuar kёshillat fetare tё kёsaj dite, pёr t’u pёrshёndetur me njёri-tjetrin, pёr tё marrё bekimet e xhamisё, ato tё Ramazanit qё sapo shkoi dhe, natyrshёm, ato tё kёsaj feste qё vjen njё herё nё çdo vit, me bekimet dhe mirёsitё e saj...
           
Ora 6 e 50. Ёshtё koha tё largohem nga xhamia e qendrёs sё qytetit, drejt xhamisё sё Parrucёs. Aty do tё zhvillohet ceremonia zyrtare e kёsaj dite. Pas pak minutash do tё falet namazi i Fitrit. Pas pak minutash, nga njё tjetёr foltore do tё pёrcjell urimet dhe lutjet e kёsaj dite festive para atyre qindra besimtarё e besimtare qё kanё dalё nga shtёpitё e tyre drejt shtёpive tё All-llahut, pёr tё kёrkuar pёlqimin dhe dashurinё e Tij...
           
Nё hyrje tё xhamisё sё Parrucёs, hapёsirat pёr tё lёvizur janё tё vogla. Ёshtё mbushur plot tё rinj besimtarё. Ka edhe prej atyre qё asnjёherё nuk ia kanё kthyer shpinёn xhamisё sё rinisё sё tyre. E kanё simbol tё shenjtё tё besimit e tё fesё xhaminё e Parrucёs. Nuk e lёnё vetёm asnjёherё xhaminё e tyre, besnikёt e vjetёr tё saj...
           
Nga kursija e dersit, imami i xhamisё i lajmёron tё pranishmit pёr afrimin e kohёs sё namazit me shumё tekbire. U shpjegon mёnyrёn se si falet ai dhe merr tё zbresё...
           
“All-llahu ekber”... Teksa drejtoj faljen e kёtij bajrami, aty, nё mihrabin e xhamisё sё Parrucёs, para syve tё mi, si nё njё shirit tё nurtё, shfaqen momentet mё tё bukura e plot emocion tё kaluara nё muajin e Kur’anit. Sa tё shumta janё..! Mё shfaqet drita e Ramazanit, qё tashmё ёshtё larguar nga ne. Sё bashku me tё, mblidhen nё njё pikё tё vetme krejt angazhimet e sinqerta tё çdo dite prej ditёve tё tij dhe... pёr njё moment, mihrabi i xhamisё sё Parrucёs bёhet dritё si drita e bardhё me tё cilёn na rrethoi ai, muaji i feksimeve hyjnore...
           
I shoqёruar nga tekbiret, qё mbushin atmosferёn gjithandej, ngjitem nё shkallёt e minberit tё gurtё tё xhamisё me histori hoxhallarёsh tё vjetёr shkodranё...
           
Mesazhet e Fitёr Bajramit pёrveçse udhёzojnё besimtarёt, hapin para syve tё tyre edhe dritare tё reja, nga tё cilat u mundёsohet tё vёshtrojnё pёrtej realiteteve ku jetojnё. Na japin mundёsinё tё ndryshojmё diçka, secili nё jetёn e tij! Na mundёsojnё tё rinovojmё besёn me Zotin e gjithёsisё dhe tё ruajmё identitetin tonё fetar, qё qёndron mbi çdo gjё tjetёr nё kёtё botё! Na mundёsojmё tё shohim veten nё pasqyrёn e besimit, afrimit me Mёshiruesin dhe.., tё ndalim hapat e hutuar nё rrugёtimet e kёsaj bote tё pёrkohshme...
           
Ёshtё Fitёr Bajram! Njerёzit festojnё. Natyrshёm, secili prej nesh ka marrё diçka tё tё pazёvendёsueshme nga muaji i mrekullive dhe ngjarjeve tё mёdha. Secili prej nesh shpreson se Ramazani qё sapo shkoi, do tё jetё njё ndёrmjetёsues i rёndёsishёm nё ditёn kur, asgjё pёrveç punёve tё mira, nuk do tё vlejё... dhe natyrshёm gёzohet nё ditёn e festёs sё Fitrit...
           
Gёzuar dhe pёr shumё mot, Fitёr Bajramin!

Shkodёr, mё 9 shtator 2010
Dita e parё e Fitёr Bajramit

[1] Kur’ani, Nuh, 2-3.
[2] Kur’ani, Nuh, 5-6 dhe 11.