Paraditën e së mërkures, më 27 qershor 2012, Myftiu i Shkodrës Imam Muhamed Sytari, i shoqëruar edhe nga një pjesë e stafit të Myftinisë Shkodër, ka zhvilluar inspektime të punimeve të reja në disa prej vakëfeve, ku Myftinia Shkodër ka nisur punimet për ndërtimin a rehabilitimin e objekteve përkatëse.
           
Fillimisht Myftiu ka ndjekur punimet te xhamia e vjetër e Qafës, ku ka ndjekur procesin e shtrimit të territorit të brendshëm të xhamisë së vjetër me kalldrëm dhe gur. Myftiu është interesuar edhe për pastrimin e këtij territori nga një ndërhyrje e vjetër e Ujësjellësit Shkodër, që vështirëson punimet në kuadratin e xhamisë së vjetër. Pas kontakteve zyrtare me drejtoreshën e Ujësjellës-Kanalizimeve Shkodër, ndërhyrja për pastrimin e vakëfit do të bëhet shumë shpejt.
           
Më pas, Myftiu ka inspektuar edhe punimet në xhaminë e re të fshatit Kuç. Ai ka ndjekur nga afër punimet dhe ka përgëzuar ndërtuesit për punën e mirë, me cilësi dhe në një afat të shkurtër. Myftiu ka dhënë disa udhëzime në terren dhe është lutur për mbarësinë e punimeve të reja për plotësimin e xhamisë në këtë fshat.
           
Inspektimi ka vijuar edhe në xhaminë e re të fshatit Mes-Myselim, ku Myftiu ka vëzhguar nga afër hapjen e rrugës së re të xhamisë, që pritet të inaugurohet në një kohë shumë të afërt. Ai ka inspektuar nga brenda punimet e përfunduara të tavanit të xhamisë dhe disa anekse të tjera të saj.           

Më pas, Myftiu ka inspektuar edhe punimet për murin rrethues të xhamisë së fshatit Dragoç dhe kufijtë e zonës vakëf të kësaj xhamie. Vlen të theksohet se xhamia e fshatit Dragoç ka një territor shumë të madh, i cili është zënë padrejtësisht nga objekte të ndryshme, që pritet të shemben dhe të bëhet pastrimi i plotë i vakëfit të kësaj xhamie.